Facebook កំពុងតែដំណើរការសាកល្បងមុខងារស្វែងរក Wi-Fi “Free” ដែលនៅជុំវិញចំនុចដែលអ្នកប្រើប្រាស់កំពុងឋិននៅ ដើម្បីជួយឱ្យអ្នកប្រើប្រាស់ មាន Wi-Fi ប្រើគ្រប់ទីកន្លែង និងគ្រប់ពេលវេលា ។
ថ្មីៗនេះ ទំព័រ The Next Web បានរកឃើញមុខងារថ្មីស្រឡាងមួយដែលមានឈ្មោះថា Find Wi-Fi នៅក្នុង Menu Options នៅលើកម្មវិធី Facebook សម្រាប់ iOS កំណែថ្មីបំផុត។ នៅពេលចូលទៅកាន់មុខងារនេះ អ្នកនឹងបានឃើញផែនទីមួយដែលបង្ហាញអំពីទីតាំង ក្រុមហ៊ុន ឬហាងទាំងឡាយដែលមានផ្ដល់ Wi-Fi ដោយមិនគិតថ្លៃ។ កន្លែងដែលមាន Wi-Fi មិនគិតថ្លៃ នឹងមានលេចចេញសញ្ញាអង់តែនពណ៌ក្រហម។ ប៉ុន្តែ អ្នកប្រើប្រាស់ត្រូវតែបើក GPS ដើម្បីជួយឱ្យកម្មវិធីនេះអាចកំណត់ទីតាំងបានត្រឹមត្រូវ។
យ៉ាងនេះក្ដី មុខងារនេះកំពុងតែស្ថិតក្នុងដំណាក់កាលសាកល្បងនៅក្នុងតំបន់មួយចំនួននៅឡើយ។ គេមិនទាន់ដឹងថា ពេលណាទើបកម្មវិធីនេះត្រូវបានដាក់ឱ្យប្រើប្រាស់ជាផ្លូវការនោះទេ ប៉ុន្តែ យោងតាមអ្នកតំណាងរបស់ Facebook បានបង្ហើបប្រាប់ VentureBeat ឱ្យដឹងថា Find Wi-Fi នឹងត្រូវបានដាក់ឱ្យប្រើប្រាស់នាពេលឆាប់ៗខាងមុខ។
ទំព័រ Phonearena បានអះអាងថា មុខងារស្វែងរក Wi-Fi គឺជាជំហានថ្មីរបស់ Facebook ក្នុងការទាក់ទាញអ្នកប្រើប្រាស់ថ្មី រក្សាអ្នកប្រើប្រាស់បច្ចុប្បន្ន ក៏ដូចជាជួយឱ្យអ្នកប្រើប្រាស់ Facebook មាន Wi-Fi ប្រើប្រាស់គ្រប់ទីកន្លែង គ្រប់ពេលវេលា។
ក៏ប៉ុន្តែ ការតភ្ជាប់ Wi-Fi សាធារណៈ ក៏ប្រឈមនឹងហានិភ័យខ្ពស់ ព្រោះថា អ្នកប្រើប្រាស់ងាយនឹងត្រូវបានគេលួចចូលគ្រប់គ្រងទូរស័ព្ទ និងលួចទិន្នន័យសំខាន់ៗ។
ប្រែសម្រួល ៖ តារាប្រភព ៖ Phonearena