ព័ត៌មានអន្តរជាតិ ៖ មន្រ្តីផ្លូវការ ឥណ្ឌូនេស៊ីម្នាក់ ត្រូវបានរកអោយឃើញថា បានស្រែកគំហក និងទះកំភ្លៀង នារីបំរើការលើយន្តហោះម្នាក់រហូតទាល់តែនាងយំ ខណៈពេលដែលនាងស្នើ អោយគាត់បិទទូរស័ព្ទ នៅពេលដែលយន្តហោះជិតធ្វើការហោះហើរ កាលពីល្ងាចថ្ងៃ ពុធ ទី ១២ មិថុនាកន្លងទៅនេះ នេះបើតាមការអោយដឹង ពីគេហទំព័រសារព័ត៌មានបរទេស សឹង្ហបុរី singaporeseen ដែលទើបតែបានចេញផ្សាយកាលពីប៉ុន្មានម៉ោងមុននេះ។
លើសពីនេះ បើយោងតាមរបាយការណ៍ Indoboom អោយដឹងថា លោក Zakaria Umar Hadi ដែលជាប្រធានក្រុមប្រឹក្សាអភិវឌ្ឈន៍ក្នុងតំបន់ ( Regional Investment Coordinating Board (BKPMD) ) ដើមឡើយ បានធ្វើការស្តីបន្ទោសអោយនារីបម្រើការលើយន្តហោះមួយនៅឯអាកាសយានដ្ឋានអន្តរជាតិ Soekarno-Hatta Airport ខណៈពេលដែលនាងបានស្នើដោយគួរសមអោយគាត់បិទទូរស័ព្ទ ស្របពេលដែលយន្តហោះជិតធ្វើការហោះហើរនោះ។
បន្តិចក្រោយមក នាង Nur Febrian វ័យ ៣១ ឆ្នាំ ដែលជានារីបម្រើការលើយន្តហោះនោះក៏បានដើរចេញទាំងទឹកមុខក្រៀមក្រំ និងមិនសុខចិត្ត។ មួយម៉ោងក្រោយមក នៅពេលដែលយន្តហោះ បានទៅដល់កន្លែងចុះចតហើយនោះ គេបែរជាឃើញលោក Zakaria ស្រែកគំហក និងទះកំភ្លៀងនាងតែម្តង។
ទាំងពីរនាក់ ត្រូវបានក្រុមមនុស្សដែលជាអ្នកធ្វើដំណើរដូចគ្នានោះ ឃាត់ និងបំបែកចេញពីគ្នា។ លោក Zakaria នាគ្រានោះ ក៏ត្រូវបានក្រុមមន្រ្តីជំនាញធ្វើការចាប់ឃាត់ខ្លួន ដើម្បីសាកសួរពីព័ត៌មានលម្អិត៕
ដោយ ៖ រិទ្ធីប្រភព ៖ singaporeseen