បច្ចេកវិទ្យា ៖ រយៈពេលជិត ២សប្តាហ៍ក្រោយ iPhone SE បង្ហាញខ្លួនជាផ្លូវការនោះ ទីបំផុត iPhone ម៉ូដែលថ្មីមួយនេះ បានមកដល់ស្រុកខ្មែរហើយ ក៏ប៉ុន្តែអ្វីដែលជាបញ្ហាចោទ និងចម្ងល់នោះគឺ តម្លៃសម្រាប់ Device 16GB និង 64GB ប៉ុន្មានទៅ?
ជាការពិត បើយោងតាមតារាងតម្លៃទូរស័ព្ទដៃក្នុងស្រុក បញ្ជាក់អោយដឹងថា Device ចុងក្រោយបំផុត ពី Apple នោះគឺ iPhone SE មានតម្លៃដល់ទៅ ៥១០ដុល្លារ និង ៦១០ដុល្លារ ពោល តម្លៃ ៥១០ដុល្លារសម្រាប់ iPhone SE ដែលមានអង្គចងចាំ 16GB និងតម្លៃ៦១០ដុល្លារ សម្រាប់ iPhone SE ដែលមានអង្គចងចាំ 64GB ។
គួររំឮកថា iPhone SE បានបង្ហាញខ្លួនជាផ្លូវការ ជាមួយនឹងអេក្រង់ទំហំ ៤អ៊ីន ដូចទៅនឹង iPhone 5S ហើយលក្ខណៈសម្បត្តិខាងក្នុងរបស់វា ដូចទៅនឹង iPhone 6S។ ស្មាត ហ្វូននេះមានសំបកធ្វើពីលោហធាតុអាលុយមីញ៉ូម និងមានបន្ថែមពណ៌ផ្កាឈូក ដ៏ស្រស់ស្អាតមួយ ទៀតផង។ ជាមួយនឹងបន្ទះ chip Apple A9 64-bit, camera 12 megapixel, អំពូល flash LED ពីរពណ៌ សេនស័រស្គែនក្រយៅដៃ Touch ID, តំណភ្ជាប់ NFC និង Apple Pay អាចនិយាយបានថា អ្នកកំពុងតែ កាន់នៅក្នុងដៃនូវស្មាតហ្វូនស៊េរីខ្ពស់ និងកម្លាំងម៉ាស៊ីនខ្លាំងមួយដូច្នេះដែរ គ្រាន់តែវាមានទំហំរាងតូច បន្តិចប៉ុណ្ណោះ។
ដោយ ៖ តារា