ព័ត៌មានអន្តរជាតិ ៖ គ្រឿងអលង្ការដែលត្រូវបានលួចពីការតាំងពិពណ៌នៅឯក្រុង Cannes ប្រទេសបារាំង កាលពីថ្ងៃអាទិត្យកន្លងទៅនេះ ត្រូវបានរកអោយឃើញថា មានតម្លៃដល់ ទៅជិត ១៣៦ លានដុល្លារឯណោះ នេះបើយោងតាមការដកស្រង់អត្ថបទផ្សាយ ពីគេហទំ ព័រសារព័ត៌មានបរទេស CNN ។
យ៉ាងណាមិញ បើយោងតាមសម្តីលោក Philippe Vique អនុប្រធានព្រះរាជអាជ្ញាប្រឆាំងនឹងបទល្មើលឧក្រិដ្ឋកម្មអោយដឹងថា បទល្មើសលួចប្លន់លើកនេះ វាគឺជាបទល្មើសទី ៣ហើយដែលបានកើតឡើងចាប់តាំងពីខែ ឧសភា ស្របពេលដែលបទល្មើសការលួចប្លន់លើកនេះ បានកើតឡើងកាលពីវេលាព្រឹកថ្ងៃអាទិត្យ នៅក្នុងការតាំងពិព័រណ៍គ្រឿងអលង្ការមួយនៅសណ្ឋាគារ Carlton ។
លើសពីនេះ ប្រភពសារព័ត៌មានដដែលបន្ថែមថា ក្រុមឧក្រិដ្ឋជន ដែលជាចោរប្លន់ទាំងនោះ ប្រដាប់ទៅដោយកាំភ្លើងខ្លី បានចេញយុទ្ធនាការប្លន់មួយនេះ ដោយបានបិទបាំងអត្តសញ្ញាណរបស់ខ្លួន ដោយបិទមុខជាមួយនឹងកន្សែង ក៏ដូចជា ការពាក់មួក អំឡុងពេលនៃការចេញប្លន់នោះ ពួកគេក៏មានការគំរាមបាញ់ក្រុមមនុស្ស ដែលនៅទីនោះផងដែរ បើសិនណា មានការតដៃពីសំណាក់សមត្ថកិច្ច។
ដោយឡែក លោក Philippe អះអាងបន្ថែមថា ភ្លាមៗនោះ ក្រុមមន្រ្តីជំនាញក៏បានចុះធ្វើការអន្តរាគមន៍ តែមិនមានការបាញ់បោះនោះទេ ស្របពេលដែលគ្មានបុគ្គលណាមួយទទួលរងរបួសធ្ងន់ និងស្រាលនោះទេ៕
ដោយ ៖ ពិសីប្រភព ៖ CNN