ដោយប្រើប្រាស់ថ្មដែលមានថាមពល 5.000 mAh ទូរសព្ទ ZenFone Max របស់ Asus ពិតជាអាចយកឈ្នះលើម៉ូដែលស្មាតហ្វូនមួយចំនួនក្នុងទីផ្សារនាបច្ចុប្បន្ន ទាក់ទិននឹងថាមពលថ្ម។
Asus ហាក់មិនចង់ប្រកួតប្រជែងផ្នែកគ្រឿងម៉ាស៊ីន ជាមួយនឹងបណ្ដាក្រុមហ៊ុនផ្សេងៗ ប៉ុន្តែ ក្រុមហ៊ុននេះ បានយកចិត្តទុកដាក់ខ្លាំងទៅលើថាមពលថ្ម នៅពេលបំពាក់ថ្មដែលមានថាមពលដល់ទៅ 5.000 mAh ដល់ ZenFone Max។
ថាមពលថ្ម ដែលមានកម្លាំងខ្លាំងបែបនេះ គឺអាចឱ្យអ្នកប្រើប្រាស់ យកទៅបញ្ចូលថាមពលឱ្យថ្មនៃឧបករណ៍ដទៃដែលអាចតភ្ជាប់ជាមួយ ZenFone Max។ ប៉ុន្តែ មកដល់ពេលនេះ មិនទាន់មានការពិសោធសាកល្បងណាមួយ ដើម្បីវាយតម្លៃអំពីថាមពលថ្មជាក់ស្ដែងរបស់ម៉ាស៊ីនដែលទើបនឹងបង្ហាញខ្លួននេះនៅឡើយ។
ក្រៅពីប្រើប្រាស់ថ្មដែលមានថាមពលធំ ស្មាតហ្វូន ZenFone Max ក៏ត្រូវបានបំពាក់អេក្រង់ IPS 5,5 inch HD ប្រើកញ្ចក់រឹង Gorilla Glass 4 ថ្មីបំផុត ដែលមានសមត្ថភាពការពារខ្ពស់បំផុត។ស្មាតហ្វូន ZenFone Max ប្រើប្រូសេសឺរ Snapdragon 410 quad-core 1.2-GHz និង RAM 2 GB។ ម៉ាស៊ីននេះ មានអង្គចងចាំក្នុង 16 GB ព្រមទាំងអស់បន្ថែមតាមរយៈរន្ធដោតអង្គចងចាំខាងក្រៅ។
Zenfone Max ត្រូវបានបំពាក់កាមេរ៉ាក្រោយ 13 MP មានភ្លើងហ្វ្លាសមួយគូ និងអាចចាប់យករូបភាពផ្ទៃមុខ (autofocus) ដោយឡាហ្សែរ។ ពិសេស កាមេរ៉ាមុខរបស់ស្មាតហ្វូននេះ ឡើងដល់ 5MP ដែលមានឡែនទំហំ 85អង្សា អាចឱ្យអ្នកថតរូបខ្លួនឯងជាក្រុម បានយ៉ាងច្បាស់។
Asus Zenfone Max បំពាក់ប្រព័ន្ធប្រតិបត្តិការ Android 5.0 Lollipop ប្រើស៊ីមពីរ មានប្រព័ន្ធ 4G LTE, GPS, Wi-Fi ស្ដង់ដា n និង Bluetooth 4.0។
ស្មាតហ្វូនរបស់ Asus នេះ នឹងត្រូវបានដាក់លក់ចាប់ពីខែតុលាខាងមុខ។ ប៉ុន្តែ ក្រុមហ៊ុន មិនទាន់បង្ហើបឱ្យដឹងអំពីតម្លៃ និងទីផ្សារជាក់លាក់ របស់ស្មាតហ្វូននេះនៅឡើយ៕
ប្រែសម្រួលដោយ ៖ តារាប្រភព ៖ Androidauthority/GSMArena