អន្តរជាតិ ៖ បើតាមការអោយដឹងពីគេហទំព័រសារព័ត៌មានបរទេស jschina ដែលទើបតែបានចេញផ្សាយនាពេលកន្លងទៅនេះ បានបញ្ជាក់អោយដឹងថា ចិនបានជាប់ឈ្មោះជាប្រទេសទី៣ដែលមានសម្បត្តិបេតិកភណ្ឌពិភពលោក ច្រើនជាងគេបំផុត ពោលគឺ ចិនមានសម្បត្តិបេតិកភណ្ឌពិភពលោក ដល់ទៅ ៤៣ បេតិកភណ្ឌឯណោះ នៅក្នុងបញ្ជីរបស់អង្គការ UNESCO ។
លើសពីនេះទៅទៀត របាយការណ៍ដដែលក៏បានបញ្ជាក់បន្ថែមផងដែរថា នៅក្នុងអំឡុងកិច្ចប្រជុំដំណើរការទៅលើវិស័យវប្បធម៌ អំឡុងថ្ងៃទី២៣ ដល់ ២៦ តុលា លោក Cai Wu ដែលជារដ្ឋមន្រ្តីមកពីក្រសួងវប្បធម៌ ក៏បានលើកឡើងផងដែរថា ក្នុងនាមលោកជាប្រមុខរដ្ឋទៅលើវិស័យវប្បធម៌ លោកសូមធ្វើការគាំទ្រយ៉ាងមុតមាំ ក៏ដូចជា ថែរក្សា អភិរក្សការពារនូវសម្បត្តិបេតិកភណ្ឌរូបីយ នឺងអរូបបីយ ដែលវាមិនត្រឹមតែជាសម្បត្តិរបស់ប្រទេសចិននោះទេ តែវាក៏ជាទ្រព្យសម្បត្តិមនុស្សជាតិផងដែរ។
គួររំឭកផងដែរថា កាលបើនិយាយពីសម្បត្តិបេតិកភណ្ឌពិភពលោក របស់ប្រទេសចិន លោកអ្នកក៏ដូចជាបណ្តាប្រិយមិត្តភាគច្រើន ប្រាកដជាធ្លាប់បានស្គាល់រួចមកហើយ នូវមហាកំពែងចិន ( Great Wall ) ខណៈពេលដែលមហាកំពែងមួយនេះ ក៏ត្រូវបានចាត់ចូលជាសម្បត្តិបេតិកភណ្ឌរបស់ពិភពលោកផងដែរ នៅក្នុងលេខរៀងទី ៦ នៃបញ្ជីនៃបញ្ជីរបស់អង្គការ UNESCO៕