កាលពីថ្ងៃទី៣១ ខែតុលា ឆ្នាំ២០១២ តម្រួតសៀមនៅស្រុកអារញ្ញប្រាថេត ប្រទេសថៃ បានបញ្ជួនជនជាតិខែ្មរ៦ នាក់ ដែលមានការពាក់ព័ន្ធទៅ នឹងករណីឈើគ្រញូង ៨ ដុំ និងរថយន្ដ២ គ្រឿង ទៅកាន់តុលាការ ខេត្ដស្រះកែវ ដោយចោទប្រកាន់ពីបទនាំឈើគ្រញូងមកកាន់ប្រទេសកម្ពុជា តាមច្រកទ្វារអន្ដរជាតិខ្លងលឹក-ប៉ោយប៉ែត។
កាលពីវេលាម៉ោង ១០.១៥ នាទី ព្រឹកថៃ្ងទី ២៩ ខែ តុលា ឆ្នាំ ២០១២ ស្ថិតនៅក្នុងភូមិ ខ្លោងថចាន់ ឃុំ ខ្លោងថចាន់ ស្រុក អារញ្ញប្រាថេត ខេត្ដស្រះកែវ ទាហានឈុតខ្មៅសៀម វីរសេនាធំលេខ ១២ ដែលឈរជើងតាមបន្ទាត់ព្រំដែនកម្ពុជា-សៀម ស្ថិតនៅក្នុងស្រុក អារញ្ញប្រាថេត ខេត្ដ ស្រះកែវ បានឃាត់រថយន្ដ ២ គ្រឿង បើកបរដោយជនជាតិខែ្មរ ក្នុងនោះដែរ ទាហានឈុតខ្មៅថៃ បានឆែកឆេររថយន្ដ ទាំង ២ គ្រឿង បានរកឃើញឈើគ្រញូងចំនួន ៨ ដុំ ដែលបង្កប់នៅបាតរថយន្ដ និងឃាត់ខ្លួនជនជាតិខ្មែរ ៦ នាក់ ទី១ មានឈ្មោះ ចៀន ជីវ័ន្ដ ភេទ ប្រុស អាយុ ២៧ ឆ្នាំ ទី២ មានឈ្មោះ ហ៊ឹម សំអាត ភេទ ប្រុស មានអាយុ ២៧ ឆ្នាំ, ទី៣ ចាន់ សូនី ភេទ ប្រុស មានអាយុ ២០ ឆ្នាំ, ទី៤ មានឈ្មោះ ចាន់ វាសនា ភេទ ប្រុស មានអាយុ ២៣ ឆ្នាំ, ទី៥ មានឈ្មោះ សឿ ជាឡា ភេទ ប្រុស មានអាយុ ២៧ ឆ្នាំ។
ជនជាតិខ្មែរទាំង ៦ នាក់ ដែលនគរបាលសៀមឃាត់ខ្លួននេះ បានអះអាងនៅមុខទាហានឈុតខ្មៅ ពួកគេបានដឹកឈើគ្រញូងនេះ ពីឃ្លាំងមួយកន្លែងដែលស្ថិតនៅក្នុងស្រុក អារញ្ញប្រាថេត ពួកគេមិនមែនជាម្ចាស់ឈើទេ គឺពួកគេស៊ីឈ្នួលដឹកតែប៉ុណ្ណោះ។
ទំព័រ PL ដកស្រង់ប្រភពពីប្រទេសថៃ បានអោយដឹងថា ក្រុមតម្រួតថៃបានបន្ដការស្រាវជ្រាវ រកមេខ្លោងដែលជាជនជាតិសៀមនៅពីក្រោយ ការដឹកជញ្ជូនឈើគ្រញូងនេះ៕
ដោយ ៖ សុផលប្រភព ៖ PL