ពីរនាក់បងប្អូនភ្លោះ Stuart និង Ian Paton បានយកឈ្នះលើគូប្រជែងដោយល្ពៅមួយផ្លែដែលមានទម្ងន់ដល់ទៅ ១.០២២គីឡូក្រាម ពោលគឺជាង ១តោន។ ផ្លែល្ពៅនេះ មានកំពស់ ១,២ម៉ែត្រ និងមានមុខកាត់ ៥,៥ម៉ែត្រ បានបំបែកឯតទគ្គកម្មដែលខ្លួនបានបង្កើតឡើងកាលពីពីរឆ្នាំមុន។
ពីរនាក់បងប្អូនអាយុ ៥៥ឆ្នាំនេះ ក៏បានជាប់ចំណាត់ថ្នាក់លេខ២ និងលេខ៣ ក្នុងពិធីប្រកូតប្រជែងអំពីល្ពៅនៅរដូវស្លឹកឈើជ្រុះ នៅ Netley, Hampshire ប្រទេសអង់គ្លេស។
ពួកគេបានចំណាយពេល ៥ម៉ោងជារៀងរាល់ថ្ងៃដើម្បីថែទាំផ្លែល្ពៅ និងស្រោចទឹក ៣៨០លីត្ររាល់ថ្ងៃ។
ពីរនាក់បងប្អូននេះ មានការសប្បាយចិត្តជាខ្លាំង ព្រោះបានបំបែកឯតទគ្គកម្មដែលបង្កើតឡើងដោយពួកគេ និងត្រូវបានកត់ត្រាចូលក្នុងសៀវភៅឯតទគ្គកម្មនៅប្រទេសអង់គ្លេស។ Stuart និង Ian Paton កំពុងមានគម្រោងបំបែកឯតទគ្គកម្មពិភពលោកស្ដីអំពីផ្លែល្ពៅដែលមានទម្ងន់ ១.០៥៤គីឡូក្រាម។
Ian Paton ថ្លែងថា “យើងទាំងពីរនាក់សុទ្ធតែមានការរំភើប។ វាជារឿងល្អណាស់ដែលបានបំបែកឯតទគ្គកម្មរបស់ខ្លួនឯង។ តាមពិត យើងខ្ញុំមិនមានវិធីអាថ៌កំបាំងអ្វីនោះទេ គ្រាន់តែធ្វើការដោយយកចិត្តទុកដាក់ប៉ុណ្ណោះ។ រាល់ឆ្នាំយើងតែងតែកែលំអបច្ចេចទេសក្នុងការដាំដុះ ប្រការនេះមិនមែនជារឿងងាយស្រួល”។
Ian Paton អះអាងថា “យើងខ្ញុំនឹងបំបែកឯតទគ្គកម្មពិភពលោក។ ជាមួយនឹងល្បឿននេះ យើងពិតជាអាចធ្វើបាន”។
ចំណែក Stuart វិញ និយាយថា “រាល់ថ្ងៃ យើងខ្ញុំត្រូវចំណាយពេល៥ម៉ោងដើម្បីថែទាំផ្លែល្ពៅ។ យើងមិនដែលធុញទ្រាន់នោះទេ”។ Stuart បន្តថា “យើងខ្ញុំស្រោចទឹកឱ្យផ្លែល្ពៅនេះ ចំនួន៣៨០លីត្រក្នុងមួយថ្ងៃ។ នេះគឺជាការងារលំបាក ប៉ុន្តែ យើងចូលចិត្តវា”។
ប្រែសម្រួល ៖ បុត្រាប្រភព ៖ BBC