សិង្ហបុរី ៖ បើយោងតាមសេចក្តីប្រកាសកាលពីម្សិលមិញនេះ ពីសំណាក់នាយកដ្ឋានការពារជីវិតសត្វព្រៃសិង្ហបុរីបានអោយដឹងថា សត្វខ្លាឃ្មុំមួយគូរដែលមានឈ្មោះថា Kai Kai នឹង JaiJai នឹងមកដល់ប្រទេសនេះ នាថ្ងៃទី 06 ខែកញ្ញាខាងមុខនេះ។
លើសពីនេះទៅទៀត នៅក្នុងសេចក្តីប្រកាសនោះក៏បានបញ្ជាក់យ៉ាងច្បាស់ផងដែរថា សាធារណៈជនទាំងអស់អាចចូលទស្សនា នូវសត្វខ្លាឃ្មុំមួយគូរនេះបាន នៅក្នុងអំឡុងខែធ្នូខាងមុខនេះ ពោលគឺរយៈពេលមួយខែក្រោយ បន្ទាប់ពីពួកវា អាចទម្លាប់រស់បាន ក្នុងទីជម្រកថ្មីរបស់វា នៅឯ River Safari ។
គួរបញ្ជាក់ផងដែរថា សត្វខ្លាឃ្មុំមួយគូរនេះ គឺជាកម្ចីរយៈពេល 10 ឆ្នាំ ពីសមាគមអភិរក្សសត្វព្រៃប្រទេសចិន ដែលហៅកាត់ថា (CWCA) ។ លើសពីនេះទៅទៀត បើយោងតាមសម្តីលោក Zhong Yi ដែលជានាយកប្រចាំ CWCA បានប្រាប់ដល់ទីភ្នាក់ងារសារព័ត៌មានអោយដឹងថា ក៏មានភ្នាក់ងារតំណាងមកពីសមាគមមួយនេះ បានចុះទៅធ្វើការត្រួតពិនិត្យពីទីជម្រកថ្មី ដែលសត្វខា្លឃ្មុំទាំងពីរនោះ នឹងរស់នៅ ហើយបានរកអោយឃើញថា អ្វីៗវាដំណើរការបានល្អ នឹងសមស្រប ពោលគឺ គ្មានភាពមិនប្រក្រតីណាមួយបានកើតឡើងនោះទេ ។
លោក Zhong ក៏បាននិយាយបន្ថែមផងដែរថា ៖ មកទល់នឹងពេលនេះ សត្វខ្លាឃ្មុំមួយគូរនោះ ត្រូវបានបញ្ជូនអោយមករស់នៅដាច់ពីគេ ក្នុងដែនជំរកការពារសត្វព្រៃ Ya'an នាខេត្ត Sichuan ប្រទេសចិន ។ គួររំឮកផងដែរថា បើយោងតាមប្រភពសារព័ត៌មានច្បាស់ការណ៍ក៏បានបញ្ជាក់យ៉ាងច្បាស់ផងដែរថា ពួកវាទាំងពីរក្បាលនឹងត្រូវបានបញ្ជូនមកដល់សិង្ហបុរី បន្ទាប់ពីបានធ្វើការហោះហើរចេញពីប្រទេសចិនតាមជើងយន្តហោះ ស្របពេលដែលនឹងមកដល់អាកាសយានដ្ឋាន Changi នាវេលាម៉ោង 8:20 នាទី នៅថ្ងៃទី 06 ខែកញ្ញា ខាងមុខនេះ ៕
ដោយ ៖ រិទ្ធីប្រភព ៖ relax