ព័ត៌មានអន្តរជាតិ ៖ ជាការពិត មនុស្សភាគច្រើន តែងចាប់ផ្តើមទាក់ទងគ្នា ជាមួយដៃគូស្នេហានៅឯកន្លែងធ្វើការ។ ដោយឡែក បើសិនជាការងាររបស់អ្នក តំរូវអោយពាក់កន្ទុយត្រី ដែលមានទម្ងន់ដល់ទៅ ២៧ គ.ក ពោលគឺ នាងមច្ឆា តើអាចរកស្នេហាពិត ដែលស្តែងចេញពីកន្លែងធ្វើការបានដែរឬទេ?
ជាក់ច្បាស់ណាស់ បើយោងតាមប្រភពសារព័ត៌មានបរទេស បានគូសបញ្ជាក់អោយដឹងថានាងមច្ឆា Melissa Dawn វ័យ ៣១ ឆ្នាំ ដែលត្រូវបានពិភពលោកទទួលស្គាល់ថា ជានាងមច្ឆា ប្រកបទៅដោយទេពកោសល្យខ្ពស់នោះ ជាលទ្ធផល បានរកឃើញស្នេហាពិតរបស់ខ្លួនហើយ។
នាងមច្ឆា Melissa Dawn ត្រូវបានរកអោយឃើញថា ពិតជាមានសមត្តភាពពិសេសក្នុងការហែលក្នុងទឹក បានដល់ទៅ ៥ នាទី ដោយមិនចាំបាច់ប្រើឧបករណ៍ជំនួយដកដង្ហើមអ្វីនោះទេ ជាមួយនឹងសិល្បៈនៃការតុបតែងខ្លួន ដោយពាក់កន្ទុយត្រី ខណៈពេលដែលនាងត្រូវបានពិភពលោកទទួលស្គាល់ថាជា នាងមច្ឆាពិតៗ ស្របពេលដែល កាលពីពេលកន្លងទៅនាងក៏ធ្លាប់បានដើរតួសម្តែងល្បីៗផងដែរ ពោលគឺ ដើរតួជានាងមច្ឆាតែម្តង។
ដោយឡែក មកទល់នឹងពេលនេះ Melissa បានរកឃើញស្នេហ៍ពិតរបស់ខ្លួនហើយនោះគឺលោក Antonio Padilla វ័យ ៣៣ ឆ្នាំ ដែលជាអ្នកសម្តែងរងតែងដើរតួជា បុរស មច្ឆា (mer-man) ។ គួរបញ្ជាក់ផងដែរថា គូស្នេហ៍មច្ឆាមួយគូនេះ បានចាប់ផ្តើមមានចិត្តស្រឡាញ់គ្នា ចាប់តាំងពីពួកគេ បានធ្វើការជាមួយគ្នា ក្នុងអំឡុងឆ្នាំ ២០០៩ ៕
ដោយ ៖ ពិសីប្រភព ៖ dailymail