អន្តរជាតិ ៖ បុរសម្នាក់ត្រូវបានរកអោយឃើញថា បានរងរបួសជាទម្ងន់ តែសំណាងល្អមិនស្លាប់បាត់បង់ជីវិត បន្ទាប់ពីធ្លាក់ពីអាគារជាន់ទី៨ ខណៈពេលដែលគាត់ព្យាយាមចុះមកក្រោមតាមរយៈបង្អួចដោយប្រើតំណស្រោមពូក សំរូតចុះមកក្រោម ក្រោយពីភរិយារបស់ខ្លួនបង្ខាំងគាត់ទុកនៅក្នុងបន្ទប់គេង នេះបើយោងតាមសេចក្តីរាយការណ៍ ដែលបានចេញផ្សាយដោយទំព័រសារព័ត៌មានបរទេស Happening កាលពីវេលាល្ងាចម្សិលមិញនេះ។
គួរបញ្ជាក់ផងដែរថា ឧបទ្ទេវហេតុគ្រោះថ្នាក់លើកនេះ បានកើតឡើងនៅក្នុងក្រុង Tallinn ប្រទេសអេស្តូនៀរ កាលពីពេលកន្លងទៅនេះ។លើសពីនេះទៅទៀត បើតាមប្រភពដដែលបានបញ្ជាក់ អោយដឹងថា បុរសដែលជាជនរងគ្រោះរូបនោះ ពិតជាសំណាងហួសពីការស្មានខណៈពេលដែលធ្លាក់ចុះពីជាន់ទី៨ មិនស្លាប់គ្រាន់តែរបួសជាទម្ងន់ ក៏ព្រោះតែធ្លាក់ចំពីលើគំនរព្រិល ស្របពេលដែលខ្លួនទទូចចេញពីបន្ទប់ទៅជួបមិត្តភក្តិ ខណៈពេលប្រពន្ធរបស់ខ្លួនបង្ខាំងទុកនៅក្នុងបន្ទប់។
ដោយឡែក មកទល់នឹងពេលនេះបុរសដែលជាជនរងគ្រោះកំពុងសម្រាកព្យាបាលនៅមន្ទីរពេទ្យ ស្របពេលដែលករណីខាងលើនេះ ត្រូវបានថតជាប់ និងរាយការណ៍ដោយសាក្សីម្នាក់ដែលបានឃើញផ្ទាល់នឹងភ្នែក គឺលោកស្រី Yekaterina Horoshko វ័យ ៣៥ ឆ្នាំ៕
ដោយ ៖ រិទ្ធីប្រភព ៖ Happening