ព័ត៌មានអន្តរជាតិ ៖ បើយោងតាមសេចក្តីរាយការណ៍ ដែលបានចេញផ្សាយដោយទំព័រសារព័ត៌មានបរទេស ដេលីម៉ែល កាលពីពេលកន្លងទៅនេះ បានបញ្ជាក់អោយដឹងថា ទន្តពេទ្យមួយរូប ត្រូវបានចាប់ឃាត់ខ្លួន ខណៈពេលដែលចាប់ដកធ្មេញអ្នកជម្ងឺរបស់ខ្លួនទាំងកម្រោលដោយសារតែមានការឈ្លោះប្រកែកទាក់ទិនទៅនឹង វិក័យប័ត្រគិតលុយ ។
គួរបញ្ជាក់ផងដែរថា ទន្តពេទ្យរូបនោះមានឈ្មោះកាត់ថា FJGS វ័យ ៣៩ ឆ្នាំ ជាទន្តពេទ្យមកពីក្រុង Zaragoza ប្រទេសអេស្ប៉ាញ។ លើសពីនេះទៅទៀត ប្រភពសារព័ត៌មានដដែលបានបញ្ជាក់បន្ថែមអោយដឹងផងដែរថា ករណីជម្លោះខាងលើនេះអាចកើតមានឡើង បន្ទាប់ពីស្រ្តីសុំមិនបញ្ជេញអត្តសញ្ញាណម្នាក់ មានការងឿយឆ្ងល់ពីវិក័យប័ត្រគិតលុយ ហេតុអ្វីក៏ថ្លៃម្ល៉េះគ្រាន់តែធ្វើការព្យាបាល និង ដាក់ធ្មេញក្នុងរយៈពេលប៉ុន្មានខែចុងក្រោយនេះ ដោយធ្វើការចោទសួរទៅទន្តពេទ្យ។
ភ្លាមៗនោះ ក៏មានការច្រឡោតខឹង និង ចាប់ដកធ្មេញដែលបានដាក់នាពេលកន្លងមកទាំងកម្រោល រហូតដល់ធ្វើអោយនាងឈាមពេញមាត់។ រំពេចនោះ នាងក៏ប្តឹងដល់ភ្នាក់ងារមានសមត្តកិច្ចអោយចាប់ទន្តពេទ្យចិត្តសឿងរូបនេះ ខណៈពេលដែលការផ្តន្ទាទោសនឹងត្រូវបានធ្វើឡើងទៅតាមផ្លូវច្បាប់របស់ប្រទេសនេះ៕
ដោយ ៖ រិទ្ធីប្រភព ៖ ដេលីម៉ែល