បណ្ដាស្មាតហ្វូនលំដាប់មធ្យម និងលំដាប់ខ្ពស់របស់ Huawei ថ្មីៗនេះ សុទ្ធតែប្រើឈីប Kirin ដែលផលិតដោយខ្លួនឯង ប៉ុន្តែ ស្មាតហ្វូនថ្មីមួយដែលទើបនឹងលេចមុខ នឹងប្រើឈីបរបស់ Qualcomm។
ស្មាតហ្វូនមួយរបស់ក្រុមហ៊ុនចិន ទើបតែត្រូវបានឆ្លងកាត់ការត្រួតពិនិត្យ TENAA ។ ផលិតផលនេះ មានឈ្មោះកូដថា MLA-TL00 ដែលដំណើរការដោយឈីប Snapdragon 652 ។ សម្បកខ្នងរបស់ស្មាតហ្វូននេះ ត្រូវបានគេជឿថា នឹងធ្វើអំពីលោហធាតុ។
បណ្ដាទិន្នន័យស្ដីពីគ្រឿងម៉ាស៊ីនរបស់ MLA-TL00 រួមមានអេក្រង់ 5.5 inch full HD, RAM 3 GB (ហើយវាអាចនឹងមានកំណែ RAM 4 GB ផងដែរ), អង្គចងចាំ 16 GB/32 GB/64 GB, កាមរ៉ាក្រោយ 16 MP និងកាមេរ៉ាមុខ 8 MP ។ រីឯថាមពលថ្ម មានកម្លាំង 3.270 mAh។
ស្មាតហ្វូនរបស់ Huawei នេះ មានកម្រាស់ 7.3 mm, មានម៉ាស៊ីនស្កេនក្រយៅដៃ ហើយនៅពេលចេញលក់ វានឹងដំណើរការដោយ Android 6.0។ MLA-TL00 អាចនឹងបង្ហាញខ្លួនជាផ្លូវការនៅពាក់កណ្ដាលខែកក្កដា។ Huawei គ្រោងនឹងលក់ MLA-TL00 ក្នុងតម្លៃចាប់ពី ៣០០ដុល្លារអាមេរិកឡើងទៅ។
ប្រែសម្រួល ៖ បុត្រា