ពីទីក្រុងសេអ៊ូល កូរ៉េខាងត្បូង ៖ កាលពីថ្ងៃព្រហស្បត្តិ៍ ម្សិលមិញនេះ ប្រទេសកូរ៉េខាងត្បូងបានព្រមានប្រទេសកូរ៉េខាងជើង នៃផលវិបាកដ៏ធ្ងន់ធ្ងរ ប្រសិនបើកូរ៉េខាងជើងបដិសេធការផ្តល់ជូនទៅកាន់កិច្ចពិភាក្សាអំពីស្ថានភាពដ៏គួរអោយខ្លាច នៅតំបន់រោងចក្រផលិ តដែលជាកន្លែងដែលទីក្រុងព្យុងយ៉ាង បានផ្អាកសកម្មភាព ខណៈពេលដែលខ្លួនបានសារភាពថា ខ្លួនបានបង្កើតភាពតានតឹងនាពេលថ្មីៗនេះ នេះបើយោងតាមការដកស្រង់សេចក្តីរាយការណ៍ ពីទីភ្នាក់ងារសារព័ត៌មានបរទេស CNN ។
លើសពីនេះ បើយោងតាមសម្តីអ្នកនាំពាក្យកូរ៉េខាងត្បូង លោក Kim Hyung-seok បានជំរុញអោយភាគី គឺប្រទេសកូរ៉េខាងជើង ឆ្លើយតបទៅនឹងសំណើ នៃការផ្តល់ជូនពីសំណាក់កូរ៉េ ខាងត្បូង អោយមានកិច្ចចរចារដោយសន្តិវិធីរួមគ្នាស្តីពីភាពស្មុគស្មាញដែលកើតមានទៅលើតំបន់ឧស្សាហកម្ម Kaesong Industrial Complex អោយបានមុនវេលាថ្ងៃត្រង់ ថ្ងៃសុក្រខាងមុខនេះ។
ទន្ទឹមនឹងនេះ លោក Kim Hyung-seok បានបន្ថែមថា ប្រសិនបើក្រុងព្យុងយ៉ាង មិនទទួលយកសំណើនេះ ដោយសន្តិវិធីនោះទេ រដ្ឋាភិបាលទីក្រុងសេអ៊ូល នឹងមិនមានជំរើសនោះទេក៏ប៉ុន្តែនឹងចាត់វិធានការ ផ្នូរមរណៈ ។ គាត់មិនបានបញ្ជាក់ច្បាស់នោះទេ ថាតើវិធានការដ៏ក្តៅគគុកមួយនេះ នឹងមានសកម្មភាពអ្វីកើតឡើង អោយពិតប្រាកដនោះទេ ។
គេមើលឃើញថាអ្វីដែលជានិមិត្តរូបដ៏សំខាន់ចុងក្រោយនៃកិច្ចសហប្រតិបត្តិការរវាងប្រទេសទាំងពីរ នោះគឺតំបន់ឧស្សាហកម្ម Kaesong គឺជាតំបន់សេដ្ឋកិច្ចរួមគ្នាមួយដែលនៅផ្នែកម្ខាងនៃព្រំប្រទល់ដែនប្រទេសកូរ៉េខាងជើង មានសហគ្រាសអាជីវកម្ម របស់ពលរដ្ឋកូរ៉េខាងត្បូង ជាង ១២០ សហគ្រាសអាជីវកម្ម ។
នៅដើមខែនេះ ខណៈពេលដែលបានក្តៅស្លឹកត្រចៀកជាខ្លាំង បន្ទាប់ការវាយប្រហារខាងវោហាស័ព្ទ ពីសំណាក់កូរ៉េខាងត្បូង និងសហរដ្ឋអាមេរិកនោះ កូរ៉េខាងជើងក៏បានបិទព្រំប្រទល់ដែន មិនអោយប្រជាពលរដ្ឋកូរ៉េខាងត្បូង អាចចូលទៅតំបន់ឧស្សាហកម្ម Kaesong Indust-rial Complex ៕
ដោយ ៖ រិទ្ធីប្រភព ៖ CNN