ព័ត៌មានអន្តរជាតិ ៖ មនុស្ស ១០ នាក់បានស្លាប់បាត់បង់ជីវិត ស្របពេលដែលមនុស្សជាង៥០ នាក់ផ្សេងទៀតបានរងរបួស ក្នុងហេតុការណ៍ផ្ទុះរថយន្តស៊ីទែន ដឹកប្រេងឥន្ទនៈមួយកាលពីថ្ងៃទី០១ វិច្ឆិកា នៅទីក្រុងរីយ៉ាដ ប្រទេសអារ៉ាប់ប៊ីសាអ៊ូឌីដ នេះបើយោងតាមសេចក្តីរាយការណ៍ ដែលបានចេញផ្សាយ ដោយគេហទំព័រសារព័ត៌មានបរទេស liveleak កាលពីម្សិលមិញនេះ ។
លើសពីនេះទៅទៀត បើយោងទៅតាមរបាយការណ៍ដដែលនេះ ក៏បានបញ្ជាក់បន្ថែមផងដែរថា មូលហេតុដែលបានធ្វើអោយផ្ទុះឆេះនូវរថយន្តស៊ីទែន ដឹកប្រេងឥន្ទនៈនេះ ក៏ដោយសារតែវាបានទៅបុកនឹងស្ពានមួយនៅទីក្រុងរីយ៉ាដ។
គួររំឭកផងដែរថា ទន្ទឹមនឹងការផ្ទុះនូវរថយន្តស៊ីទែន ដឹកប្រេងឥន្ទនៈមួយគ្រឿងនេះ ឥទ្ទិពលនៃការឆាបឆេះក៏បានធ្វើអោយអាគារមួយចំនួនបានខូចខាត ស្របពេលដែលរថយន្តនៅលើស្ពានមួយចំនួនផ្សេងទៀត បានឆាបឆេះផងដែរ នេះបើយោងតាមសម្តីសាក្សី ដែលបានឃើញហេតុការណ៍នោះផ្ទាល់៕
ដោយ ៖ រិទ្ទីប្រភព ៖ liveleak