ព័ត៌មានអន្តរជាតិ ៖ ដោយយោងតាមការដកស្រង់អត្ថបទផ្សាយ ពីគេហទំព័រសារព័ត៌មានបរទេសសឹង្ហបុរី អាស៊ីវ័ន ដែលទើបតែបានចេញផ្សាយកាលពីម្សិលមិញនេះ អោយដឹងថារថយន្តទំនើប Lamborghini ពណ៌ទឺកក្រូច ត្រូវបានរកអោយឃើញថា បានឆាបឆេះយ៉ាងសន្ធោសន្ធៅ នៅខាងក្រៅសាលាបឋមសិក្សាមួយកន្លែង តាមបណ្តោយផ្លូវ Outram ក្នុងប្រទេសសឹង្ហបុរី។
គួរបញ្ជាក់ផងដែរថា ករណីផ្ទុះឆេះរថយន្តទំនើបនេះ បានបង្កជាភាពភ្ញាក់ផ្អើលជាខ្លាំងស្របពេលដែលមានមនុស្សម្នាជាច្រើន បានមកប្រមូលគ្នាផ្តុំកកកុញ ដោយផ្តិតយកនូវរូបភាព ខណៈពេលដែលចរាចរណ៍នាពេលនោះ ក៏ត្រូវបានកកស្ទះផងដែរ។
ដោយឡែក ប្រភពសារព័ត៌មានដដែល មិនបានគូសបញ្ជាក់អោយដឹងថា ករណីខាងលើនេះ បានកើតឡើង នាពេលណាអោយពិតប្រាកដនោះទេ តែវាទំនងជានាពេលថ្មីៗនេះ ដោយគ្រាន់តែបញ្ជាក់ថា ករណីនេះ បានកើតឡើងកាលពីម៉ោងពីររសៀល។
គ្មាននរណាម្នាក់ ទទួលរងរបួសធ្ងន់ឬស្រាលនោះទេ ។ យ៉ាងណាមិញ បើយើងងាកក្រឡេកទៅមើលម្ចាស់រថយន្ត មិនត្រូវរកអោយឃើញថា នៅកន្លែងកើតហេតុនោះទេហើយបើនិយាយពីមូលហេតុ ដែលបានធ្វើអោយរថយន្តទំនើបនេះ ផ្ទុះឆេះ បើតាមសម្តីសាក្សីអោយដឹងថា មកពីបើកទៅបុកនឹងប្រអប់ ក៏ដូចជា បង្គោលអគ្គីសនី (electrical box) ៕
ដោយ ៖ រិទ្ធីប្រភព ៖ អាស៊ីវ័ន