ព័ត៌មានអន្តរជាតិ ៖ ពិតណាស់ កាលពីវេលាព្រឹកម្សិលមិញនេះ ទំព័រសារព័ត៌មានយើងខ្ញុំធ្លាប់បានចេញផ្សាយរួចម្តងមកហើយ នូវករណីសោកនាដកម្មផ្លូវដែក ផ្ទុះឆេះរថភ្លើងដែលបានសម្លាប់មនុស្សជាច្រើនសិបនាក់ នៅឯប្រទេសអេស៉្បាញ។
យ៉ាងណាមិញ មកទល់នឹងពេលនេះ បើយោងតាមប្រភពសារព័ត៌មានចុងក្រោយបង្អស់បានអះអាងអោយដឹងថា វេលាថ្មើរនេះ ចំនួនជនរងគ្រោះដែលបានស្លាប់បាត់បង់ជីវិតកើនឡើងដល់ យ៉ាងហោចណាស់ ៨០ នាក់ ស្របពេលដែលក្រុមមនុស្សច្រើនជាង១០០នាក់ផ្សេងទៀត បានទទួលរងរបួសធ្ងន់ និងស្រាល។
ដោយឡែក បើនិយាយពីមូលហេតុពិត ដែលបានបណ្តាលអោយកើតមានឡើងនូវគ្រោះថ្នាក់ដ៏រន្ធត់មួយនេះ ក៏ត្រូវបានរកឃើញផងដែរ ក្រោយពីធ្វើការតាមដានស៊ើបអង្កេតនោះគឺ បណ្តាលមកពីការបើករថភ្លើងក្នុងល្បឿនមួយដ៏លឿនមែនទែន លើសពីការកំណត់ទុករបស់ច្បាប់ ពោលគឺ អ្នកបើកបររថភ្លើងបើកក្នុងល្បឿន ដល់ទៅជិត ២០០ គ.ម ក្នុងមួយម៉ោង ស្របពេលដែលច្បាប់ចែង និងកំណត់ថានៅពេលណាមកដល់ទីប្រជុំជនមួយនេះ ពោលគឺ កន្លែងកើតហេតុ រថភ្លើងតំរូវអោយបើកក្នុងល្បឿនតែ ៨០ គ.ម ក្នុងមួយម៉ោងតែប៉ុណ្ណោះ។
ដោយសារតែការបើករថភ្លើង ក្នុងល្បឿនមួយដ៏លឿនហួសកំរិតនេះហើយ ទើបធ្វើអោយរថភ្លើង បើកធ្លាក់ចេញពីផ្លូវ និង បណ្តាលអោយកើតមានឡើង នូវ សោកនាដកម្ម ដ៏គួរអោយរន្ធត់នេះតែម្តង។ ខាងក្រោមជាវីដេអូ តាមដានទស្សនាបន្តិចទៅ ដើម្បីអោយជ្រាបកាន់តែច្បាស់ ៖
ដោយ ៖ រិទ្ធីប្រភព ៖ yahoo