ព័ត៌មានអន្តរជាតិ ៖ បើយោងតាមការដកស្រង់អត្ថបទផ្សាយ ដែលទើបតែបានចេញផ្សាយដោយគេហទំព័រសារព័ត៌មានបរទេស ស្កាយ កាលពីប៉ុន្មានម៉ោងមុននេះ អោយដឹងថា នារីវ័យ ២៤ ឆ្នាំម្នាក់ មានឈ្មោះ Sarah McClay ជាបុគ្គលិកបំរើការនៅក្នុងសួនសត្វ ត្រូវបានរកឃើញស្លាប់បាត់បង់ជីវិតយ៉ាងអណោចអធម បន្ទាប់ពីត្រូវបានសត្វខ្លាកំណាចមួយក្បាលបើកការវាយប្រហារទៅលើរូបនាង កាលពីរសៀលថ្ងៃសុក្រកន្លងទៅ នៅឯសួនឧទ្យានជាតិ South Lakes Wild Animal Park ដែលមានទីតាំងស្ថិតនៅក្នុងប្រទេសអង់គ្លេស។
គួរបញ្ជាក់ផងដែរ ក្រុមគ្រួសាររបស់នាង បន្ទាប់ពីទទួលបានព័ត៌មានមួយនេះ ពិតជាមានក្តីរន្ធត់ជាខ្លាំង ខណៈពួកគេបាននិយាយថា វាគឺជាសោកនាដកម្មមួយដ៏គួរអោយសោកស្តាយបំផុត។ ដោយឡែក ប្រភពសារព័ត៌មានដដែលបន្ថែមថា ជនរងគ្រោះត្រូវបានប្រកាសថាស្លាប់បាត់បង់ជីវិតនៅឯមន្ទីរពេទ្យ Royal Preston Hospital បន្ទាប់ពីនាងត្រូវបានបញ្ជូនសង្គ្រោះនៅទីនោះ តាមរយៈឧទ្ធម្ភាភចក្រ។
យ៉ាងណាមិញ បើយោងតាមសម្តីមន្រ្តីប៉ូលីសប្រចាំតំបន់ អោយដឹងថា ពួកគេនឹងធ្វើការតាមដានស៊ើបអង្កេត ទៅលើករណីខាងលើនេះ ខណៈពេលដែលពួកគេមានការងាយឆ្ងល់ជាខ្លាំងថាតើវាអាចកើតមានឡើងបានយ៉ាងដូចម្តេច ក៏ព្រោះតែខ្លាទាំងអស់ដែលមាន ត្រូវបានឃុំនៅក្នុងរបាំងការពារ ស្របពេលដែលបុគ្គលិកទាំងអស់នឹងមិនមានហានិភ័យចំពោះអាយុជីវិតនោះទេ។
ខ្លាកំណាច ដែលបានបើកការវាយប្រហារទៅលើបុគ្គលិកស្រីវ័យ ២៤ ឆ្នាំខាងលើនេះមានទម្ងន់ដល់ទៅជាង ៣០០ គក ឯណោះ៕
ដោយ ៖ រិទ្ធីប្រភព ៖ ស្កាយ