ព័ត៌មានអន្តរជាតិ ៖ បើតាមការអោយដឹងពីទំព័រសារព័ត៌មានបរទេស Happening ដែលទើបតែបានចេញផ្សាយកាលពីម្សិលមិញនេះ អោយដឹងថា មនុស្ស ១៤ នាក់ ត្រូវបានស្លាប់បាត់បង់ជីវិត ហើយ ៤៧ នាក់ទៀតត្រូវបានរបួស ក្រោយការផ្ទុះក្នុងភោជនីយដ្ឋានមួយកន្លែង កាលពីយប់ថ្ងៃទី ២៣ វិច្ឆិកា ក្នុងខេត្តសាន់ស៊ី ភាគខាងជើងចិន ។ ការផ្ទុះកើតមាននាវេលាម៉ោង ១៩និង ៥២ នាទី ( ម៉ោងក្នុងស្រុក ) ក្នុងភោជនីយដ្ឋាន XIYANGYANG HOTPOT RESTAURANTស្ថិតនៅក្នុងស្រុកស៊ូយ៉ាង ក្រុងជីនហ្សុង ស្របពេលដែលការស៊ើបអង្កេតជាជំហានដំបូងបានអះអាងថា ការធ្លាយឧស្ម័នអាចជាប្រភពនៃគ្រោះថ្នាក់នេះ ។
លើសពីនេះទៅទៀត របាយការណ៍ដដែលបានបន្ថែមថា បណ្តាអ្នករបួសក្នុងនោះ ១៧ នាក់របួសធ្ងន់ត្រូវបានបញ្ជូនទៅមន្ទីរពេទ្យ ។ ក្នុងចំណោមជនរងគ្រោះស្លាប់ក្នុងគ្រោះថ្នាក់នោះ ៦ នាក់ស្លាប់នៅនឹងកន្លែង ហើយ ៨ នាក់ទៀតស្លាប់នៅមន្ទីរពេទ្យ បើទោះជាមានការខិតខំប្រឹងប្រែងជួយសង្គ្រោះពីបណ្តាក្រុមគ្រួពេទ្យក៏ដោយ ។ ការផ្ទុះយ៉ាងខ្លាំងធ្វើឱ្យបែកកញ្ចក់ បង្អួចភោជនីយដ្ឋានដែលមាន ២ ជាន់នេះ ហើយកញ្ចក់បង្អួចហាងទាំងឡាយដែលនៅក្បែរៗនោះ ក៏បែកដែរ ៕
ដោយ ៖ ពិសីប្រភព ៖ Happening