ព័ត៌មានអន្តរជាតិ ៖ បើយោងតាមការដកស្រង់អត្ថបទផ្សាយ ដែលបានចេញផ្សាយដោយទំព័រសារព័ត៌មានបរទេស CNN បានគូសបញ្ជាក់អោយដឹងថា មកទល់នឹងពេលនេះ ចំនួនជនរងគ្រោះដែលបានស្លាប់បាត់បង់ជីវិត នៅក្នុងឧបទ្ទេវហេតុគ្រោះធម្មជាតិរញ្ជូយដី នៅក្នុងប្រទេសចិនបានបន្តកើនឡើងទៀតហើយ ពោលគឺ ១៨៦ នាក់ បានស្លាប់បាត់បង់ជីវិត ខណៈជាង ១ម៉ីននាក់ផ្សេងទៀតបានរងរបួស បន្ទាប់ករណីគ្រោះថ្នាក់ធម្មជាតិខាងលើនេះ បានកើតឡើងកាលពីថ្ងៃសៅរ៍ ទី២០ ខែមេសា កន្លងទៅ នាភាគនិរតី Sichuan នៃខេត្ត ប្រទេសចិន ។
គួរបញ្ជាក់ផងដែរថា ករណីគ្រោះថ្នាក់ធម្មជាតិដ៏រន្ធត់មួយនេះ មានកំលាំងរញ្ជួយដល់ទៅ ៧រ៉ិចទ័រ ឯណោះ ។ ដោយឡែក បើយោងតាមប្រភពសារព័ត៌មានដដែល បានបន្ថែមអោយដឹងផងដែរថា កាកបាទក្រហមរបស់ប្រទេសនេះក៏កំពុងតែដុតដៃដុតជើងក្នុងការជួយអន្តរាគមន៍ជនរងគ្រោះអោយបានទាន់ពេលវេលា ខណៈពេលដែលតំបន់រងគ្រោះ ក៏កំពុងតែប្រឈមនឹងបញ្ហាកង្វះទឹកស្អាត មិនដល់ ៣ ថ្ងៃផងនោះ បន្ទាប់ពីកើតមានឡើងនូវគ្រោះរញ្ជូយដីមួយនេះ។
លើសពីនេះទៅទៀត បើយោងតាមសម្តីមន្រ្តីផ្លូវការម្នាក់ បានអះអាងបន្ថែមថា មន្រ្តីជំនាញក៏កំពុងតែចេញយុទ្ធនាការ ជួយសង្គ្រោះរបស់ខ្លួន ដោយនៅក្នុងរួមមាន ក្រុមជួយសង្គ្រោះបន្ទាន់ រាប់ពាន់នាក់ ក៏ដូចជា មានមន្រ្តីយោធា រាប់រយនាក់ផ្សេងទៀតផងដែរ៕
ដោយ ៖ រិទ្ធីប្រភព ៖ CNN