(អេស្ប៉ាញ)៖ បុរសម្នាក់ត្រូវបានប៉ូលិស ជួយសង្គ្រោះ បន្ទាប់ពីជាប់ក្នុងធុងសំរាម នៅពេលដែលគាត់ព្យាយាមស្វែងរក ខោអាវចាស់ៗ នៅក្នុងនោះ។ ប៉ូលិសបានចែករំលែក រូបភាពបុរសដែលកំពុងជាប់ខ្លួន ក្នុងធុងសម្រាម ហើយអើតក្បាលចេញក្រៅ ដោយសារចេញមកវិញ លែងរួចប្រហែលជាកន្លះម៉ោង ទើបមានក្រុមកម្មករមកជួយ បើកគម្របឲ្យគាត់ចេញបាន។
ហេតុការណ៍ដ៏គួរឲ្យហួសចិត្តនេះ កើតឡើងនៅតំបន់ Vistabella បុរសដែលជាប់ក្នុងធុងសំរាមនេះ មានអាយុ៤៨ឆ្នាំ ដោយប៉ូលិសនិយាយថា គាត់ព្យាយាមចូលធុងសំរាមដ៏តូចចង្អៀត ព្រោះតែគិតថា នៅក្នុងនោះមានខោអាវចាស់ៗ ដែលគាត់យកទៅប្រើបាន តែបែរជាផុងខ្លួន ជាប់រើមិនរួច។ រីឯប៉ូលិសបានត្រឹមតែហួសចិត្ត ដោយមិនដឹងថា បុរសរូបនេះចូលក្នុងធុងសំរាម ដ៏តូចយ៉ាងម៉េចនឹងកើត ទើបផុងខ្លួនជាប់បែបនេះ៕
ផ្តល់សិទ្ធិដោយ ៖ ខ្មែរថកឃីង