ភ្នំពេញៈ ទស្សនិកជន បានកត់សម្គាល់ឃើញថា ចាប់តាំងពី ឆៃ លីដាឡែន វិលត្រឡប់ចូលស្រុកវិញ រួចមក នាងត្រូវបានជាប់ក្នុងបញ្ជីខ្មៅ ដែលពុំមានស្ថានីយទូរទស្សន៍ណាមួយ ហ៊ានអញ្ជើញនាងឡើងច្រៀងឡើយ ទោះជានាងធ្លាប់បានសុំទោសជាសាធារណៈ និងធ្លាប់រត់រកការអន្តរាគមន៍ ដើម្បីបានឡើងប៉ុស្ដិ៍ទូរទស្សន៍វិញក៏ដោយ ក៏ហាក់ពុំបានផលឡើយ ។
បើមហាជន ចាំមិនខុសទេ នាង ជា សុវណ្ណា តារាសម្ដែងសិចស៊ី ជំនាន់មុន ត្រូវបានបាត់ឈ្មោះទាំងស្រុង ពីសិល្បៈ ដោយសារតែនាងបានស្លៀកពាក់សិចស៊ី មិនអាចទទួលយកបានពេលនាងឡើងកម្មវិធី ផ្សាយផ្ទាល់របស់ស្ថានីយទូរទស្សន៍មួយ។ ក្រោយមកនាងក៏ឡើងសុំទោសជាសាធារណៈ តែអ្វីៗមិនអាចដូចនាងរំពឹងទុកឡើយ នាងក៏រលុបឈ្មោះពីសិល្បៈ គួរឲ្យសោកស្ដាយបំផុត ។
នាង ឆៃ លីដាឡែន សិស្សប្អូននាង ជា សុវណ្ណា បានយកស្ទីលនាង ជា សុវណ្ណា ដែរ តែមិនហ៊ានលេងក្នុងស្រុក ទៅលេងក្រៅប្រទេស ទីបំផុតនៅតែធ្លាក់ក្នុងរណ្ដៅនេះដូចគ្នា នាងហាក់មានភាពចំរូងចំរាសជាច្រើន ដូចជាធ្លាក់ខ្លួនច្រៀង ក្នុងក្លឹបរាត្រី តែនាងបានចេញមុខបកស្រាយវិញភ្លាមដែរ ។ ថ្មីៗនេះ ឆៃ លីដាឡែន បានបង្ហាញវត្តមានជាលើកដំបូង លើកញ្ចក់ទូរទស្សន៍ប៉ុស្ដិ៍លេខ៩ ដែលនាងបានស្លៀកពាក់សុភាពរាបសារជានារិខ្មែរ និងបានបកស្រាយបទចម្រៀងយ៉ាងសមរម្យ មើលទៅហាក់រៀងចាលហើយ លែងហ៊ានខ្លាំងដៃទៀតហើយ ។
ជាការពិត ខណៈ ឆៃ លីដាឡែន បានឡើងច្រៀងក្នុងស្ថានីយទូរទស្សន៍វិញភ្លាម អ្នកដែលសប្បាយចិត្តខ្លាំងជាងគេ ត្រូវបានគេដឹងថា គឺលោក អេឡិច ចិន្រ្តា ជាដៃគូស្នេហាដ៏ស័ក្តិសម ហើយបានខំថតរូប ឆៃ លីដាឡែន តាមទូរទស្សន៍មកបង្ហោះព្រោតព្រាត តាមបណ្ដាញសង្គមហ្វេសប៊ុក និងបាននិយាយថា នាងចាប់ផ្ដើមច្រៀងតាមកញ្ចក់ទូរទស្សន៍វិញហើយ សង្ឃឹមថាអ្នករាល់គ្នា នឹងគាំទ្រយើង អរគុណច្រើន..! ។
នេះហាក់បញ្ជាក់ថា លោក អេឡិច ចិន្រ្តា ហាក់នៅតែនឹកស្រម៉ៃ ដល់ដៃគូស្នេហ៍ចាស់ ដែលយិតយោងលោក ឲ្យមានឈ្មោះបោះសំឡេងក្នុងពិភពសិល្បៈដល់សព្វថ្ងៃ ព្រោះតាំងពី ឆៃ លីដាឡែន ត្រូវព្រនង់មក លោកហាក់តែលតោល គ្មានដៃគូ ណាស័ក្ដិសមជាមួយ ដូចជា នាង ឆៃ លីដាឡែន នេះទេ ៕
ដោយ ៖ LookingTodayផ្តល់សិទ្ធិដោយ ៖ ដើមអំពិល