គ្រោះថ្នាក់ ៖ បើតាមការអោយដឹងពីគេហទំព័រសារព័ត៌មានបរទេស ដែលទើបតែនឹងបានចេញផ្សាយ បានអោយដឹងថា មានឧបទ្ទេវហេតុគ្រោះថ្នាក់ចរាចរណ៍ដ៏រន្ធត់មួយបានកើតឡើង ខណៈពេលដែលរថយន្ត Lexus មួយគ្រឿងបាត់បង់ម្ចាស់ការ បោះពួយទៅបុកទម្លុះបន្ទប់គេងនៅជាន់ទីមួយ។
គួរបញ្ជាក់ផងដែរថា រឿងឧបទ្ទេវហេតុគ្រោះថ្នាក់ចរាចរណ៍ដ៏រន្ធត់មួយនេះ បានកើតឡើងនៅទីប្រជុំជន Epsom ប្រទេសអង់គ្លេស នាវេលាម៉ោង ៣ ទាបភ្លឺ កាលពីថ្ងៃអាទិត្យ ខណៈពេលដែលរថយន្ត Lexus មួយគ្រឿង បើកបរក្នុងល្បឿនលឿននឹងបានបាត់បង់ម្ចាស់ការ បោះពួយយ៉ាងលឿនស្ទុះទៅបុករថយន្តទំនើប Audi ដែលចតនៅហ្នឹងមួយកន្លែង ហើយបានបន្តហោះទៅបុកបន្ទប់គេងនៅជាន់ទីមួយតែម្តង។
លើសពីនេះទៅទៀត របាយការណ៍ដដែលបានបញ្ជាក់បន្ថែមអោយដឹងផងដែរថា សំណាងល្អដែលគូស្វាមីភរិយា កំពុងតែគេងលង់លក់នៅក្នុងបន្ទប់គេងនោះ មិនមានរបួសធ្ងន់ធ្ងរអ្វីនោះទេ ខណៈពេលដែលបុរស ៣ នាក់ ស្តិតនៅក្នុងរថយន្តបង្កហេតុ ត្រូវបានបញ្ជូនទៅកាន់មន្ទីរពេទ្យ Epsom Hospital ដើម្បីធ្វើការសង្គ្រោះបន្ទាន់៕
ដោយ ៖ ពិសិដ្ឋប្រភព ៖ Sky