ព័ត៌មានអន្តរជាតិ ៖ អាគារកំពស់ ៦ ជាន់មួយបានដួលរលំ នៅភាគកណ្តាលទីក្រុង Mum-bai កាលពីរាត្រីថ្ងៃច័ន្ទយប់មិញនេះ ដែលបានបណ្តាលអោយមនុស្ស ៥ នាក់ បានទទួលរងរបួសធ្ងន់ និងស្រាល ស្របពេលដែលក្រុមការងារជួយសង្រ្គោះបន្ទាន់ ក៏កំពុងតែចេញយុទ្ធនាការរបស់ខ្លួន ដោយមានការភ័យខ្លាច និងសង្ស័យថា មានមនុស្សជាប់គាំង ក្រោមគំនរថ្មបាក់បែកទាំងនោះ នេះយោងតាមការដកស្រង់អត្ថបទផ្សាយ ពីគេហទំព័រសារព័ត៌មានបរទេសCNN ដែលទើបតែបានចេញផ្សាយកាលពីប៉ុន្មានម៉ោងមុននេះបន្តិច។
លើសពីនេះ បើតាមប្រភពសារព័ត៌មានដដែល ក៏បានអះអាងបន្ថែមអោយដឹងផងដែរថាមូលហេតុ ដែលបានបណ្តាលអោយសំណង់អាគាររស់នៅ កំពស់ ៦ ជាន់ មួយនេះ ដួលរលំក៏ព្រោះតែ ក្រោយពីភ្លៀងមួយមេធំ បានបង្អុលមកលើតំបន់មួយនេះ។
យ៉ាងណាមិញ បើយោងតាមសម្តីមន្រ្តីផ្លូវការលោក Sitaram Kunte បានប្រាប់ដល់ទីភ្នាក់ងារសារព័ត៌មានថា ករណីបាក់រលំអាគារមួយនេះ បានកើតឡើងនៅក្នុងស្រុក Mahim ភាគកណ្តាលទីក្រុង Mumbai ដែលបានសម្លាប់មនុស្ស ១ នាក់ រីឯ ៥ នាក់ផ្សេងទៀត បានរងរបួស ស្របពេលដែលមន្ទិលសង្ស័យ បានលើកឡើងថា ទំនងជាមានមនុស្ស ៧ នាក់បានជាប់គាំងនៅក្រោមគំនរថ្មទាំងនោះ។
ផ្ទុយទៅវិញ បើយោងតាមសម្តីមន្រ្តីមកពី អង្គភាពពន្លត់អគ្គីភ័យ បានបន្ថែមថា យ៉ាងហោចណាស់ មនុស្ស ៥ នាក់ បានទទួលរងរបួសធ្ងន់ និង ស្រាល ស្របពេលដែលទិន្នន័យ ក៏ដូចជា តួរលេខបញ្ជាក់ពីចំនួនមនុស្ស ដែលបានជាប់គាំងនៅក្រោមគំនរថ្មទាំងនេះ មិនទាន់បានដឹងច្បាស់នៅឡើយទេ៕
ដោយ ៖ រិទ្ធីប្រភព ៖ CNN