ព័ត៌មានអន្តរជាតិ ៖ បើយោងតាមការដកស្រង់សេចក្តីរាយការណ៍ ដែលទើបតែបានចេញផ្សាយដោយ គេហទំព័រសារព័ត៌មានបរទេស worldnews កាលពីពេលកន្លងទៅនេះ បានបញ្ជាក់អោយដឹងថា មានភាពភ្ញាក់ផ្អើល បានកើតមានឡើងមួយរំពេច ខណៈពេលដែលមនុស្សពីរនាក់បានស្លាប់បាត់បង់ជីវិត ស្របពេលដែលច្រើននាក់ផ្សេងទៀត បានរងរបួស បន្ទាប់ពីមានការវាយប្រហារពីសំណាក់ពីងពាងមានពិសបំផុត ទៅលើប្រជាពលរដ្ឋរស់នៅក្នុងភូមិមួយ ភាគខាងជើងប្រទេសឥណ្ឌា។
គួរបញ្ជាក់ផងដែរថា ភ្លាមៗនោះ ក៏មានការអន្តរាគមន៍ ដោយបានបញ្ជូនជនរងគ្រោះទាំងអស់ទៅកាន់មន្ទីរពេទ្យ ស្របពេលដែលលោកវេជ្ជបណ្ឌិត បានប្រើមុខឡាម ក្នុងការបង្ហូរពិសចេញ តែដោយឡែក ក្នុងចំណោមជនរងគ្រោះទាំងអស់ មនុស្សពីរនាក់ ត្រូវបានស្លាប់បាត់បង់ជីវិត ក៏ព្រោះតែសារធាតុពិស ជ្រាបចូលជ្រៅបាត់ទៅហើយ។
ប្រភេទពីងពាងមានពិសខ្លាំងបំផុត អាចសម្លាប់ជីវិតមនុស្សបាន រស់នៅក្នុងប្រទេសឥណ្ឌា
បើយោងតាមសម្តីជនរងគ្រោះម្នាក់ លោក Kurmi Mina បានគូសបញ្ជាក់អោយដឹងថាអំឡុងពេលនៃការកើតមានឡើងនូវ ការវាយប្រហារពីសំណាក់ ពីងពាងពិសប្រភេទនោះភ្លាមៗនោះ លោកបានឃើញវា និងចាប់វាបំណងគ្រវែងទៅអោយឆ្ងាយ តែវាបែរជាខាំគាត់ទៅវិញ ហើយបើនិយាយពីមុខរបួសវិញ ដំបូងឡើយវាហូរឈាម បន្តិចក្រោយមកស្បែកគាត់ឡើងខ្មៅ និងចាប់ផ្តើមឈឺចាប់កាន់តែខ្លាំងតែម្តង។
លើសពីនេះក៏មានការប្រកាសអាសន្នពីសំណាក់រដ្ឋាភិបាលក្នុងស្រុក ដោយប្រកាសអោយប្រជាពលរដ្ឋ គេងបើកភ្លើងជាប់ជានិច្ចនាពេលរាត្រី បង្កាកុំអោយកើតមានឡើងនូវឧបទ្ទេវហេតុស្រដៀងគ្នានេះ ស្របពេលដែលវិធានការត្រូវបានចាត់ឡើង ដើម្បីតាមប្រមាញ់ពីងពាងពិសប្រភេទនេះ៕
ដោយ ៖ រិទ្ធីប្រភព ៖ worldnews