Freedom 251 ដែលជាស្មាតហ្វូនតម្លៃទាបបំផុតរបស់ឥណ្ឌា ឈរលំដាប់លេខ២ បន្ទាប់ពី iPhone 7 ក្នុងចំណោមផលិតផល ដែលត្រូវបានគេស្វែងរកច្រើនបំផុតក្នុង Google។
Google បានប្រកាសជាសាធារណៈនូវបញ្ជីឈ្មោះផលិតផលបច្ចេកវិទ្យាដែលទាក់ទាញបំផុតនៅលើអ៊ីធឺរណែតក្នុងរយៈពេល១២ខែកន្លងមកនេះ។ iPhone 7 ឈរលំដាប់លេខ១ គឺមិនមានអ្វីចម្លែក ព្រោះថា សូម្បីតែព័ត៌មានចចាមអារ៉ាមទាក់ទឹននឹងផលិតផលនេះ ក៏សុទ្ធតែត្រូវបានគេចាប់អារម្មណ៍។
ចំណាត់ថ្នាក់លេខ២បានទៅលើស្មាតហ្វូនរបស់ឥណ្ឌា គឺ Freedom 251។ ស្មាតហ្វូនរបស់ Ringing Bells នេះ មានតម្លៃត្រឹមតែ ២៥១ rupee ប្រហែល ៣,៦ដុល្លារអាមេរិក ប៉ុន្តែ បំពាក់អេក្រង់ qHD IPS 4 inch អង្គចងចាំ 8 GB មានប្រព័ន្ធ 3G, Wi-Fi 802.11 b/g/n, Bluetooth និង GPS។ ប៉ុន្តែ Ringing Bells ត្រូវបានគេរកឃើញថា បានចម្លងពីទូរស័ព្ទរបស់ចិន ហើយត្រូវបានពន្យាពេលដាក់លក់ និងត្រូវបានចោទថា នេះគ្រាន់តែជារឿងបោកប្រាស់។
iPhone SE ឈរលំដាប់លេខ៣ ជាស្មាតហ្វូនដែលត្រូវគេរំលឹកច្រើនបំផុតនៅពាក់កណ្ដាលដើមឆ្នាំ ២០១៦។
លំដាប់លេខ៤ បានទៅលើ iPhone 6s របស់ Apple។ ដោយសារ iPhone 7 ត្រូវបានដាក់លក់នៅខែកញ្ញា ឆ្នាំ ២០១៦ ដូច្នេះទើបអំឡុងពេលមុននោះ iPhone 6s នៅតែជាស្មាតហ្វូនដែលទាក់ទាញបំផុត។
លំដាប់ទី៥ គឺ Google Pixel ។ ស្មាតហ្វូននេះ បង្កការចាប់អារម្មណ៍ខ្លាំង ដោយសារថា វាជាស្មាតហ្វូនដំបូងដែលត្រូវបានរចនា និងផលិតដោយ Google ជំនួសឱ្យការសហការណ៍ជាមួយដៃគូ ដូចជា LG, HTC ជាដើម។ Google Pixel ត្រូវបានគេវាយតម្លៃថា ជាស្មាតហ្វូនដែលថតរូបបានច្បាស់បំផុតក្នុងលោក។
ថ្វីបើជាក្រុមហ៊ុនទូរស័ព្ទធំជាងគេក្នុងលោក ប៉ុន្តែស្មាតហ្វូនរបស់ Samsung បង្ហាញខ្លួនចាប់ពីលំដាប់លេខ៦ ជាមួយនឹង Galaxy S7។ ស្មាតហ្វូននេះ បានបង្ហាញខ្លួននៅដើមឆ្នាំ ២០១៦ និងទាក់ទាញការចាប់អារម្មណ៍ដោយសារតែមានរូបរាងស្អាត ថតរូបបានច្បាស់ល្អ និងអាចទប់ទល់នឹងជម្រាបទឹក។
លំដាប់លេខ៧ បានទៅលើ iPhone 7 Plus របស់ Apple ។
ឈរលំដាប់លេខ៨ គឺស្មាតហ្វូនដែលមានសំណាងអាក្រក់ Galaxy Note 7 របស់ Samsung ។ Galaxy Note 7 បង្ហាញខ្លួនក្នុងទីផ្សារកាលពីខែសីហា ឆ្នាំ ២០១៦ ប៉ុន្តែត្រូវបានក្រុមហ៊ុន Samsung លុបបំបាត់ពីទីផ្សារ ព្រោះតែជួបបញ្ហាផ្ទុះថ្ម។
ផលិតផលតែមួយគត់ដែលមិនមែនជាស្មាតហ្វូន បង្ហាញខ្លួនក្នុងបញ្ជីនេះ នោះគឺម៉ាស៊ីនលេងហ្គេម Nintendo Switch។ កាលពីខែតុលា Nintendo បានធ្វើឱ្យមានការចាប់អារម្មណ៍នៅពេលឧទ្ទេស នាមផលិតផលដែលជាការរួមផ្សំរវាង console និងម៉ាស៊ីនលេងហ្គេម។ ផលិតផលនេះនឹងផ្ដើមដាក់លក់ក្នុងទីផ្សារ ចាប់ពីខែមិនាឆ្នាំ ២០១៧។
Samsung Galaxy J7 ឈរលំដាប់ចុងក្រោយគេក្នុងបញ្ជី Top 10 នេះ ដោយសារវាជាស្មាតហ្វូនលំដាប់មធ្យម មានអេក្រង់ 5,5 inch និងមុខងារសំខាន់ៗជាច្រើនទៀត៕
ប្រែសម្រួល ៖ តារាប្រភព ៖ vnexpress