ព័ត៌មានអន្តរជាតិ ៖ យុវតីវ័យ ២១ ឆ្នាំម្នាក់ ជាជនជាតិតៃវ៉ាន់ មានត្រកូល Su ត្រូវបានរកអោយឃើញថា បានស្លាប់បាត់បង់ជីវិត បន្ទាប់ពីលោតចុះពីលើយន្តហោះដឹកអ្នកដំណើរធន់តូចមួយគ្រឿង បន្ទាប់ពីហោះបានរយៈកំពស់ជាង ១០០ ម៉ែត្រ នេះបើតាមការដកស្រង់អត្ថបទផ្សាយពីគេហទំព័រសារព័ត៌មាន បរទេស អាស៊ីវ័ន ដែលទើបតែបានចេញផ្សាយកាលពីប៉ុន្មានម៉ោងមុននេះ។
គួររំឭកផងដែរថា ករណីខាងលើនេះ បានកើតឡើងកាលពីម្សិលមិញ ពោលគឺបានកើតឡើងនៅឯទីប្រជុំជន Guanshan ស្រុក Taitung ប្រទេសតៃវ៉ាន់។ យ៉ាងណាមិញប្រភពសារព័ត៌មានដដែលបន្ថែមថា នាង Su គឺជាយុវតីជនជាតិតៃវ៉ាន ដែលមានឪពុកជាវេជ្ជបណ្ឌិត។
ដោយឡែក បើយោងតាមសម្តីមិត្តភក្កិស្រី របស់ជនរងគ្រោះផ្ទាល់ ដែលជាអ្នកជួលផ្ទះនៅតំបន់កើតហេតុនេះ បានអោយដឹងថា មានពេលមួយនោះ បន្ទាប់ពីពួកយើងបានធ្វើដំណើរតាមយន្តហោះដឹកអ្នកដំណើរតូចមួយ ស្រាប់តែ នាង Su បានលោតចុះពីលើយន្តហោះទៅវិញ បន្ទាប់ពីយន្តហោះធន់តូចមួយគ្រឿងហោះបានរយៈកំពស់ជាង១ ០០ ម៉ែត្រ ក្រោយពីហោះបានប្រាំនាទី។
គួរបញ្ជាក់ផងដែរថា នាងខ្ញុំពិតជាមិនបានចាប់អារម្មណ៍ នូវឥរិយាបថប្លែកៗរបស់នាងនោះទេ នាខណៈនោះ តែដឹងអីថា វាបែរអាចកើតមានឡើងនូវករណី មួយនេះទៅវិញស្របពេលដែលនាងបានបន្សល់នូវពាក្យមួយឃ្លាតែប៉ុណ្ណោះ គឺ សុំទោស ។
ទន្ទឹមនឹងនេះ បន្ទាប់ពីមានការផ្តល់ព័ត៌មានដល់ឪពុករបស់នាង គាត់ក៏បានមកដល់តំបន់នេះ ដើម្បីសហការជាមួយនឹងក្រុមមន្រ្តីប៉ូលីសជំនាញ ក្នុងការតាមដានស៊ើបអង្កេតរកមូលហេតុពិត នៃការស្លាប់បាត់បង់ជីវិតរបស់នាង ដោយមានទាន់មានលទ្ធភាពភស្តុតាងណាមួយបញ្ជាក់បានថា នាងពិតជាធ្វើអត្តឃាតអោយពិតប្រាកដនោះទេ៕
ដោយ ៖ រិទ្ធីប្រភព ៖ អាស៊ីវ័ន