គណបក្សប្រជាជនកម្ពុជា កើនប្រមាណជា ២ភាគរយ សិទ្ធិមនុស្ស ទទួលបាន ៦ ភាគរយ ខណៈដែលគណបក្សសមរង្ស៊ីថយចុះ ៥ភាគរយ ហ្វ៊ុនស៊ីនប៉ិចថយចុះ ១ភាគរយ នរោត្តមរណឫទ្ធិថយចុះជាង ១.៥ភាគរយ នេះជាលទ្ធផលបណ្ដោះអាសន្ននៃការបោះឆ្នោតឃុំ សង្កាត់អាណត្តិទីបី។
លទ្ធផលបណ្ដោះអាសន្នបានបង្ហាញថា ក្នុងចំណោមអាសនៈទាំង ១១.៤៥៩ គណបក្សប្រជាជនកម្ពុជា ទទួលបាន អាសនៈចំនួន ៨.២៨៣ គណបក្សសមរង្ស៊ី ទទួលបានត្រឹមតែ ២.១៥៥អាសនៈ គណបក្សហ្វ៊ុនស៊ិនប៉ិច ទទួលបាន ១៦០អាសនៈ គណបក្សនរោត្តម រណឫទ្ធិ ទទួលបាន ៥៣អាសនៈ ចំណែក គណបក្សសិទ្ធិមនុស្ស ទទួលបាន ៨០០អាសនៈ។ បើគិតជាភាគរយ គេឃើញថា គណបក្សប្រជាជនកម្ពុជាទទួលបានដល់ទៅ ៧៣ភាគរយ គណបក្សសមរង្ស៊ី ១៨ភាគរយ ខណៈដែលគណបក្សសិទ្ធិមនុស្សទទួលបាន ៦ភាគរយ។
គួររំឭកថា លទ្ធផលនៃការបោះឆ្នោតក្រុមប្រឹក្សាឃុំ សង្កត់អាណតិ្ដទីពីរ ឆ្នាំ២០០៧ បានបង្ហាញថា គណបក្ស ប្រជាជនកម្ពុជា ទទួលបាន ៧.៩៩៣ អាសនៈ គណបក្ស សមរង្ស៊ី ២.៦៦០ អាសនៈ គណបក្ស នរោត្តម រណឫទ្ធិ ទទួលបាន ៤២៥ អាសនៈ ចំណែក ហ្វ៊ុន ស៊ិនប៉ិច ទទួលបាន ២៧៤ អាសនៈ៕
ដោយ ៖ វិចិត្រ