ប្រលោមលោករឿង សង្សារកូន ប្អូនធម៌ប៉ា (ភាគ ៥)
លោកប៉ាព្យាយាមនិយាយលួងលោមខ្ញុំ តែទោះយ៉ាងណាក៏ដោយ ក៏ខ្ញុំឈប់ស្តាប់ដែរ ខ្ញុំបានពន្យុះអោយពួកគេទាំងពីរនាក់រស់នៅជាមួយគ្នា ព្រោះខ្ញុំមិនអាចទ្រាំមើលអ្វីដែលខ្ញុំបានឃើញនេះបន្តទៀតទេ។
ខ្ញុំរត់ចេញពីរូបភាពដែលមិនចង់ឃើញ រត់គេចពីមនុស្សដែលមិននឹកស្មានដល់រត់ទៅអោយឆ្ងាយពី ជីវិត ដែលមានម្តាយ បោះបង់ចោលរត់ទៅតាមសាហាយ មានឪពុកស្រឡាញ់ភេទដូចគ្នា មានសង្សារជាអាវុធមុខពីរ តើនៅមានអ្វីសេសសល់សម្រាប់ជីវិតខ្ញុំទៀត ? តំណក់ទឹកភ្លៀងកំពុងតែហូរធ្លាក់ចុះមកលាងខួរក្បាលដ៏ច្របូកច្របល់របស់ខ្ញុំអោយក្លាយទៅជាមនុស្សថ្មីម្នាក់ទៀត ប៉ុន្តែទោះបីជា យ៉ាងណាក៏ដោយ ក៏ស្រមោលអតីតកាលមួយនេះ នឹងតាមលងបន្លាចខ្ញុំដោយគ្មានថ្ងៃបំភ្លេចបានឡើយរហូតដល់ថ្ងៃស្លាប់។
ក្រោយពីទទួលរងនូវការឈឺចាប់ ដែលកើតមកជាតិនេះ មានជីវិតខុសគេខុសឯង ព្រោះមានម្តាយបោះបង់ចោល រត់ទៅតាមសាហាយមានឪពុកស្រឡាញ់ភេទដូចគ្នា និង មានសង្សារជាអាវុធមុខពីរ ធ្វើអោយខ្ញុំមានអារម្មណ៍អស់សង្ឃឹមខ្លាំងណាស់ក្នុងជាតិនេះ បើបន្តជីវិតអោយរស់នៅទៀត ក៏វានៅតែឈឺចាប់ ហេតុនេះខ្ញុំក៏សំរេចចិត្តថា មានតែបញ្ចប់ជីវិតខ្លួនដោយលោតពីលើស្ពានជ្រោយចង្វារ សម្លាប់ខ្លួនទេ ទើបអាចអោយខ្ញុំគេចផុតពីនរក នៃស្រមោលអតីតកាលមួយនេះ។
ប៉ុន្តែខ្ញុំក៏ដឹងខ្លួនឯងច្បាស់ដែរថា វិធីបញ្ជប់ជីវិតខ្លួនឯងរបៀបនេះ គឺមិនមែនជាដំណោះស្រាយនោះទេ តែខ្ញុំក៏មិនមានផ្លូវជ្រើសរើសផ្សេងពីហ្នឹងទៀតដែរ ។ ខ្ញុំក៏ហៅម៉ូតូឌុបពូម្នាក់ ដើម្បីជិះទៅកាន់ស្ពានជ្រោយចង្វារ ។ តាមផ្លូវ ពូម៉ូតូឌុបរូបនោះបានសួរនាំខ្ញុំយ៉ាងច្រើន តែខ្ញុំសម្បីតែមួយមាត់ក៏មិនឆ្លើយតបទៅគាត់វិញដែរ គឺគិតតែយកដៃខ្ទប់មុខ សម្រក់ទឹកភ្នែកតែប៉ុណ្ណោះ ។ ទង្វើរបស់ខ្ញុំរបៀបនេះ ពិតជាក្លាយជាចំនុចចម្ងល់របស់ពូម៉ូតូឌុបនោះប្រាកដណាស់ ។ បន្ទាប់ពីគាត់ជូនខ្ញុំមកដល់ស្ពានហើយខ្ញុំក៏ហុចលុយអោយទៅគាត់ រួចរត់ទៅកាន់បង្កាន់ដៃស្ពានយ៉ាងតក់ក្រហល់ ។
ដោយមើលពីចម្ងាយទៅឃើញខ្ញុំ កំពុងតែឆ្លេឆ្លាចង់លោតទឹកសម្លាប់ខ្លួន ពូម៉ូតូឌុបម្នាក់នោះ បានដាក់ចន្ទល់ម៉ូតូ រួចបានរត់មកឃាត់ខ្ញុំទាំងអារម្មណ៍ភិតភ័យ ។ ខ្ញុំក៏បានគ្រវែងដៃគាត់ទៅអោយឆ្ងាយប៉ុន្តែ គាត់បានចាប់ខ្ញុំយ៉ាងណែនដៃ រួចអូសខ្ញុំអោយចេញពីបង្កាន់ដៃស្ពាន រំពេចនោះ ខ្ញុំសម្តែងអារម្មណ៍ខឹងគាត់យ៉ាងខ្លាំង មិនគួរណាគាត់បានព្យាយាមមកឃាត់ខ្ញុំ មិនអោយស្លាប់យ៉ាងនេះសោះ តែគាត់បានព្យាយាមនឹងពន្យល់ណែនាំខ្ញុំ មិនអោយសម្លាប់ខ្លួន នឹង រៀបរាប់រឿងរ៉ាងទាំងអស់ប្រាប់គាត់ តើវាធ្ងន់ធ្ងរយ៉ាងណា ទើបបានជាខ្ញុំដល់ថ្នាក់គិតខ្លីដូច្នេះ ?
ខ្ញុំបាននិយាយរៀបរាប់ពីដំណើររឿងទាំងអស់ប្រាប់ដល់គាត់។ នៅពេលដែលគាត់បានស្តាប់ឮហើយគាត់បានដកដង្ហើមយ៉ាងធំហាក់ដូចជា គាត់ពិបាកចិត្តជាងខ្ញុំទៅទៀត ។ មួយសន្ទុះក្រោយមកគាត់បាននិយាយរឿងរ៉ាវ របស់គាត់ប្រាប់មកខ្ញុំវិញម្តង ដែលគាត់និយាយដោយទឹកមុខស្រងូតស្រងាត់ហាក់បង្កប់ដោយទុក្ខមួយយ៉ាងធំ ដែលមិនអាចដោះស្រាយបាន ។ គាត់បាននិយាយថា រឿងរបស់ខ្ញុំមិនខុសពីគាត់ប៉ុន្មានទេ គ្រាន់តែថារឿងគាត់អាចនឹងធំជាងគាត់ទៅទៀត ។ ខ្ញុំស្តាប់ឮបែបនេះ ខ្ញុំបាត់អារម្មណ៍ចង់ស្លាប់រលីង នឹងបើកភ្នែកធំៗ ចាំស្តាប់រឿងគាត់បន្តទៀត ។ គាត់ឧនមុខចុះ រួចនិយាយបន្តដោយសម្តីមួយៗ មកកាន់ខ្ញុំថា ជីវិតរបស់គាត់កើតមកជាអ្នករត់ឌុបនេះ គឺវាយ៉ាប់ណាស់ទៅហើយ មិនគួរណាទេវតាអោយគាត់មានកូនដែលខុសគេខុសឯង នឹង មិនដោយគន្លងធម៌ដូច្នេះទៀតសោះ។ .............
ដើម្បីអោយជ្រាប កាន់តែច្បាស់ថាតើ ដំណើរដើមទងជីវិតកូនៗរបស់ពូម៉ូតូឌុបរូបនោះ មានភាពល្វីងជូរចត់យ៉ាងណានោះ សូមប្រិយមិត្តទស្សនិកជន រង់ចាំតាមដានទស្សនានូវភាគបន្ត ដែលនឹងត្រូវចេញផ្សាយភាគបន្ត នៅលើទំព័រសារព័ត៌មាន Camnews តែម្តង៕
រៀបរៀង ៖ ពិសីអ្នកនិពន្ធ ៖ អ៊ឹម វ៉ាន់ឌីទូរស័ព្ទ ៖ 012621305