រាជធានីភ្នំពេញ ៖ កុមារីបុស្បា ប៉ាន់កំពុងមមាញឹកក្នុងការហ្វឹកហាត់ច្រៀងត្រៀមចេញទៅសំដែងក្នុងព្រឹត្តិការណ៍តន្ត្រីដ៏ធំ មួយនៅមុខប្រសាទបាយ័ន ខេត្តសៀមរាប នាពេលឆាប់ៗខាងមុខនេះ។ លោកប៉ាន់ ហ៊ាង ជាឪពុក និងជាអ្នកដឹកនាំវង់ភ្លេងឱ្យដឹងថា ការហ្វឹកហាត់សំដែង និងច្រៀងរបស់បុស្បា ប៉ាន់នាពេលនេះគឺដើម្បីត្រៀមលក្ខណៈទៅសំដែងនៅក្នុងកម្មវិធីដ៏ធំមួយដែលមានឈ្មោះថា «ព្រះគុណគ្រូ» ។ ការហាត់សមនាពេលនេះដើម្បីជាការក្រើនរំលឹក និងបន្ថែមទេពកោសល្យសមត្ថភាពរបស់បុស្បា ប៉ាន់ដែលមានស្រាប់ដើម្បីធ្វើយ៉ាងណាឱ្យការសំដែងរបស់នាងកាន់តែអស្ចារ្យ និងទទួលបានការគាំទ្រពីសាធារណជន ពិសេសជនបរទេសដែលដឹងថា ព្រឹត្តិការណ៍នៅមុខប្រាសាទបាយ័ននាពេលនោះគឺពោរពេញទៅដោយភ្ញៀវទេសចរ។
លោកបញ្ជាក់ថា ការហ្វឹកហាត់នេះគឺធ្វើជារៀងរាល់ថ្ងៃដែលចាប់ផ្តើមតាំងពីខែកុម្ភៈមកម្ល៉េះ ដោយហ្វឹកហាត់ជាក្រុមផង និងបុគ្គលផង ព្រោះសិល្បករដែលត្រូវចូលរួមសំដែងនាពេលនោះ គឺមានរហូតដល់១៧១នាក់ឯណោះ។ ការចំណាយក្នុងការរៀបចំកម្មវិធីដ៏ធំនេះ គឺមានច្រើនគួរសមដែរ ហើយលោកសង្ឃឹមថា ចំណូលដែលបានមកពីការសំដែងគឺប្រាកដជាច្រើន ។ ប្រាក់ទាំងនោះនឹងយកទៅជួយដល់សិល្បករ សិល្បការិនីដែលចូលនិវត្តន៍ និងបាត់បង់សមត្ថភាពមិនអាចបន្តការសំដែងបាន និងមានជីវភាពក្រលំបាក។
លោកប៉ាន់ ហ៊ាង និយាយថា សំរាប់សំបុត្រចូលទស្សនាមហាព្រឹត្តិការណ៍ដ៏ធំនាពេលនោះ គឺតំលៃចាប់ពីមួយម៉ឺនរៀលឡើងទៅ។ កម្មវិធីនេះមានការសហការជាមួយក្រសួងទេសចរណ៍ អាជ្ញាធរអប្សរា អង្គការយូណេស្កូ និងបណ្តាទូរទស្សន៍មួយចំនួនទៀតនៅកម្ពុជា។
ទេពកោសល្យរបស់បុស្បាប៉ាន់ មិនគ្រាន់តែទទួលភាពល្បីល្បាញនៅក្នុងប្រទេសប៉ុណ្ណោះទេ តែល្បីល្បាញលើឆាកអន្តរជាតិថែមទៀត។ នាងអាចច្រៀងបាន៣ភាសា គឺភាសាខ្មែរ អង់គ្លេស និងបារាំង ៕