ចិន ៖ បើតាមរបាយការណ៍ដែលបានចេញផ្សាយដោយ ភ្នាក់ងារសារព័ត៌មាន បានអោយដឹងថា Taobao.com គឺជាគេហទំព័រទិញឥវ៉ាន់ធំបំផុតរបស់ប្រទេសនេះ ដែលនៅក្នុងនោះក៏មានលក់នូវស្រោមមុខសិប្បនិម្មិតដែលមានតម្លៃចាប់ពី $1,573 ឡើងទៅ ។
លើសពីនេះទៅទៀត បើយោងទៅតាមសម្តី របស់ឧស្សាហករម្នាក់ដែលបានផ្តល់កិច្ចសម្ភាសន៍ដល់សារព័ត័មាន The Global Times បានអោយដឹងថា រាល់បណ្តាអតិថិជនភាគច្រើន បានបញ្ជាទិញនូវស្រោមមុខដែលមានលក្ខណៈទៅនឹងទម្រង់មុខរបស់ពួកគេ។
គួរបញ្ជាក់ផងដែរថា បើសិនណាមានការបញ្ជាទិញនូវស្រោមមុខណាមួយ នោះរយៈពេល 4 ថ្ងៃក្រោយមក នឹងត្រូវបានបញ្ជូនទៅដល់ផ្ទះរបស់ពួកគេ។ ទន្ទឹមនឹងនេះ ក៏មានការបញ្ជាក់អះអាងពីម្ចាស់ហាង ដោយបានលើកឡើងថា ស្រោមមុខទាំងអស់ លក់ជូនអតិថិជន ក្នុងគោលបំណងកែកំសាន្តតែប៉ុណ្ណោះ ដោយឡែក ក៏មានការព្រួយបារម្ភ ទាក់ទិននឹងការប្រើប្រាស់ស្រោមមុខនេះ ក្នុងអំពើឧក្រិដ្ឋផ្សេងៗផងដែរ។
ទន្ទឹមនឹងការលើកឡើងពីបញ្ហានេះ ក៏មានការដាស់តឿន ក៏ដូចជា ការស្នើសុំពីសំណាក់លោក Chen Hao ដែលជានាយកចាត់ការទូទៅនៃសមាគម Chongqing Bar បានអោយដឹងថា រាល់បុគ្គលដែលជាអ្នកលក់ក៏ដូចជាឈ្មួញកណ្តាល គួរណា ឬក៏ត្រូវតែកត់អត្ថសញ្ញាណអ្នកទិញស្រោមមុខយកទៅប្រើប្រាស់ ដើម្បីជៀសវាងក្នុងការទិញវា ក្នុងគោលបំណងធ្វើសកម្មភាពឧក្រិដ្ឋណាមួយ៕
ដោយ ៖ រិទ្ធីប្រភព ៖ globaltimes