ភ្នំពេញៈ បុរសម្នាក់ ដែលបម្រើការងារ នៅក្នុងហាង ភីហ្សាខមផេនី ត្រូវបាន កម្លាំងអធិការដ្ឋាន នគរបាល ខណ្ឌទួលគោក ឃាត់ខ្លួន ដោយចោទថាបាន ធ្វើសកម្មភាព គាស់ទូដែកដាក់លុយ របស់ក្រុមហ៊ុន Piza Company (ភីហ្សាខមផេនី) សាខាកម្ពុជាក្រោមលួចយកលុយជាង១៥០០០ដុល្លារ កាលពីថ្ងៃទី៥ ខែសីហា ឆ្នាំ២០១៣ កន្លងទៅ ។
ការឃាត់ខ្លួនជនសង្ស័យ ខាងលើ បានធ្វើឡើង នៅថ្ងៃទី០៦ ខែសីហា ឆ្នាំ២០១៣ នៅចំណុច លូប្រាំ ភូមិទ្រា៣ ផ្លូវលំ សង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញ ក្រោយពេលស្រាវជ្រាវ អស់រយៈពេល ពេញមួយថ្ងៃ ។
ប្រភពព័ត៌មានពីសមត្ថកិច្ច បានឱ្យដឹងថាជនសង្ស័យមានឈ្មោះស៊ាប ចន្ធី អាយុ២៧ឆ្នាំ មុខរបរ បុគ្គលិក Piza Company ( ភីហ្សាខាំផានី ) ផ្នែក ដឹកជញ្ជូនតាមម៉ូតូ ស្នាក់នៅផ្ទះជួលគ្មានលេខ ផ្លូវសហព័ន្ធរុស្ស៊ី សង្កាត់ទឹកថ្លា ខណ្ឌសែនសុខ រាជធានីភ្នំពេញ ។
តាមប្រភពដដែលបានបញ្ជាក់ថាកាលពីថ្ងៃទី០៥ ខែសីហា ឆ្នាំ២០១៣ វេលាម៉ោង៧ព្រឹកអធិការដ្ឋាន នគរបាល ខណ្ឌទួលគោក បានទទួល ពាក្យបណ្តឹងពីតំណាង ក្រុមហ៊ុន Piza Company ( ភីហ្សាខមផេនី ) ពីករណីចោរគាស់ទូដែក លួចយកលុយចំនួន ១៥.៨៦៤.៣៤ដុល្លារ (មួយម៉ឺនប្រាំពាន់ប្រាំបី រយហុកសិបបួនដុល្លារ និង សាមសិបបួនសេន) ។ ក្រោយពីទទួល ពាក្យបណ្តឹងនេះ សមត្ថកិច្ច បានធ្វើការ ស្រាវជ្រាវ ដោយសហការ ជាមួយ ការិយាល័យបច្ចេកទេស និង កោសល្យវិច័យ នៃស្នងការដ្ឋាននគរបាល រាជធានីភ្នំពេញ ដោយពិនិត្យ កន្លែងកើតហេតុ និងស្រាវជ្រាវ លើបុគ្គលិក ដែលសមត្ថកិច្ចមាន ការសង្ស័យ រហូតកំណត់ បានអត្តសញ្ញាណ ជនសង្ស័យ ហើយបានស្រាវជ្រាវដឹងពីកន្លែងលាក់ខ្លួន របស់ជន សង្ស័យឈ្មោះ ស៊ាប ចន្ធី សមត្ថកិច្ចក៏បាន ធ្វើការឃាត់ខ្លួន និងចាប់យកវត្ថុតាងតែម្តង ។
ក្នុងប្រតិបត្តិការនេះ សមត្ថកិច្ច បានរកឃើញ ប្រាក់ ១៥.៤៣៦ដុល្លារ (មួយម៉ឺនប្រាំពាន់បួនរយ សាមសិប ប្រាំមួយដុល្លារ សហរដ្ឋអាមេរិក ) នៅជាមួយជនសង្ស័យ ព្រមទាំងបាន ប្រគល់ជូន ក្រុមហ៊ុនវិញផងដែរ ។
ដោយឡែក ជនសង្ស័យឈ្មោះ ស៊ាប ចន្ធី កំពុងឃាត់ខ្លួនជាបណ្តោះអាសន្ន នៅអធិការដ្ឋាននគរបាលខណ្ឌទួលគោក ដើម្បីកសាងសំណុំរឿង បញ្ជូនទៅសាលាដំបូងរាជធានីភ្នំពេញ ៕
ផ្តល់សិទ្ធិដោយ៖ ដើមអម្ពិល