ប្រលោមលោករឿង ៖ សង្សារកូន ប្អូនធម៌ប៉ា ភាគ ១
ឆ្នាំនេះ ខ្ញុំមានអាយុ ១៨ ឆ្នាំហើយ នឹង ទើបតែបានប្រលងជាប់បាក់ឌុបថ្មីៗនេះផងដែរ ហេតុនេះហើយលោកប៉ា បានរៀបចំពិធីអោយខ្ញុំពីរក្នុងថ្ងៃតែមួយ គឺធ្វើខួបកំណើតគំរប់អាយុ ១៨ ឆ្នាំផង នឹង ពិធីជប់លៀងដែលខ្ញុំបានប្រលងជាប់ផង គឺធ្វើអោយខ្ញុំមានអារម្មណ៍រំភើប សប្បាយរីករាយក្រៃលែង ដែលមានលោកប៉ាមា្នក់បានផ្តល់ភាពកក់ក្តៅ ស្រលាញ់ថ្នាក់ថ្នម បើទោះបីជាខ្ញុំគ្មានម៉ាក់ហៅនឹងគេបានទៀត ក៏ពិតមែន តែខ្ញុំក៏នៅតែមានប៉ាម្នាក់សម្រាប់ឃុំគ្រងការពារ គឺគ្រប់គ្រាន់ហើយ។ ខ្ញុំមិនចង់នឹកនាដល់អ្នកម៉ាក់ទៀតសោះ ព្រោះនឹកឃើញដល់រឿងគាត់ចាកចេញពីខ្ញុំ នឹងប៉ារត់ទៅតាមសាហាយរបស់គាត់ ពេលណាធ្វើអោយខ្ញុំនឹកអាណិតដល់លោកប៉ាជាពន់ពេក មិន គួរណាមនុស្សល្អស្លូតបូត ដូចជាលោកប៉ាប៉ុណ្ណឹងហើយ អ្នកម៉ាក់នៅតែក្បត់ផិតបានទៀតសោះ ។
រីក៏ជាហេតុផលណាមួយ ដែលធ្វើអោយចិត្តរបស់អ្នកម៉ាក់ឈប់ស្តាយស្រណោះ មនុស្សដូចជាលោកប៉ា ? តែទោះជាយ៉ាងណា ក៏ខ្ញុំគិតថាអ្នកម៉ាក់គឺជាអ្នកខុសដែរ ដែលបានបោះបង់ពួកខ្ញុំទាំងពីរនាក់។
រំឮកដល់រឿងនេះពេលណា ខ្ញុំពិតជាឈឺចាប់ខ្លាំងណាស់នឹងក៏ចាំមិនភ្លេចដែរ ប៉ុន្តែថ្ងៃនេះជាថ្ងៃសិរីសួស្តីរបស់ខ្ញុំ ហេតុនេះខ្ញុំគួរណាស់តែធ្វើខ្លួនអោយសប្បាយៗ ព្រោះមានមិត្តភក្តិមកចូលរួមយ៉ាងច្រើនកុះករ។ មិត្តខ្ញុំម្នាក់ៗ បានជូនកាដូខ្ញុំគ្រប់ៗគ្នា ប្លែកតែលោកប៉ាបែរជាបាត់វត្តមានទៅវិញ នៅពេលដែលខ្ញុំកាត់នំ ធ្វើអោយខ្ញុំឆ្ងល់យ៉ាងខ្លាំង ក៏ប៉ុន្តែស្រាប់តែភ្លាមៗនោះ ខ្ញុំក៏ឃើញវត្តមានលោកប៉ាដើរមកជាមួយ នឹងមនុស្សម្នាក់ខ្ពស់សង្ហាអាយុប្រហែលជា ២៣ ឆ្នាំឆ្ពោះតម្រង់មករកខ្ញុំ ។ ពេលនោះលោកប៉ា បានណែនាំខ្ញុំអោយស្គាល់គាត់ ដោយប្រាប់ខ្ញុំថា គេត្រូវជាប្អូនធម៏របស់គាត់មានឈ្មោះថា“តារា” ។ ខ្ញុំមិនថាអ្វីនោះទេ ព្រោះខ្ញុំជឿលើក្រសែភ្នែករបស់លោកប៉ាថា សេពគប់អ្នកណា អ្នកនោះប្រាកដជាមនុស្សល្អ។
ប៉ុន្តែ អ្វីដែលសំខាន់ទាក់ទាញចិត្តខ្ញុំអោយចាប់អារម្មណ៍គេនោះ គឺភាពរួសរាយរាក់ទាក់របស់គេមើលទៅមានភាពសិចស៊ីពិបាកនឹងនិយាយណាស់។ ខ្ញុំគិតថាខ្លួនឯងកំពុងតែចាប់អារម្មណ៍គេខុសពីធម្មតាហើយ តែព្យាយាមធ្វើធម្មតារហូតដល់ចប់កម្មវិធី ។ ពេលពិធីខួបកំណើតបានបញ្ជប់ តារា បានអូសដៃខ្ញុំទៅគៀនផ្ទះ ហើយហុចប្រអប់កាដូតូចមួយមកអោយខ្ញុំ ធ្វើអោយខ្ញុំឆ្ងល់យ៉ាងខ្លាំងព្រោះឡើងស្រាលស្ញើកហាក់ដូចមិនមានអ្វីនៅក្នុងហ្នឹងអញ្ជឹង ។ រួចហើយគាត់បានប្រើភាសាអូនបងនឹងពាក្យជូនពរមួយ\ចំនួនមុននឹងគាត់លាខ្ញុំត្រលប់ទៅវិញ ។ ខ្ញុំសែនរំភើបរកថាមិនត្រូវ ហើយនៅយប់នោះកាដូអ្នកណាក៏ខ្ញុំមិនសូវខ្វល់ដែរ ក្រៅពីកាដូ តារា ដែលបានជូនខ្ញុំ ។ ខ្ញុំចាប់កាដូដ៏ស្រាលមួយនោះមក ហើយក៏បានបើកមើលឃើញក្រដាសពីសន្លឹក : ១ ជាលេខទូរស័ព្ទរសប់គាត់ នឹងមួយទៀតសរសេថា “១៤៣” ។
ដើម្បីអោយជ្រាប កាន់តែច្បាស់ថាតើ តួលេខ ១៤៣ មានន័យយ៉ាងណានោះ សូមប្រិយមិត្តទស្សនិកជន រង់ចាំតាមដានទស្សនានូវភាគបន្ត នាថ្ងៃបន្ទាប់ ពោលគឺ នៅលើទំព័រសារព័ត៌មាន Camnews តែម្តង។ បញ្ចាក់ ៖ ចាប់តាំងពីសប្តាហ៍ក្រោយទៅ រឿងប្រឡោមលោកមួយនេះ នឹងត្រូវចេញផ្សាយពីរដងក្នុងមួយសបា្តហ៍ ពោលគឺ នៅលើទំព័រសារព័ត៌មាន Camnews ដូច្នេះ ទស្សនិកជនរង់ចាំតាមដានទស្សនាទាំងអស់គ្នាណា ៕
រៀបរៀង ៖ ពិសីអ្នកនិពន្ធ ៖ អ៊ឹម វ៉ាន់ឌីទូរស័ព្ទ ៖ 012621305