ទេសចរណ៍ ៖ បន្ទាប់ពីទទួលបានជោគជ័យក្នុងការប្រារព្ធទិវាបេតិកភណ្ឌអឺរ៉ុបកាលពីឆ្នាំ២០១៥ ស្ថានទូតបារាំងនឹងបើកទ្វារជាថ្មីម្តងទៀតទទួលសាធារណជនទស្សនាដោយសេរីនៅថ្ងៃសៅរ៍ទី១៧ ខែកញ្ញា ឆ្នាំ២០១៦ ពេលព្រឹកចាប់ពីម៉ោង៩៖០០ដល់ម៉ោង១២៖០០ និងពេលរសៀលពីម៉ោង១៤៖០០ ដល់១៦៖៣០។
ដោយបានឆ្លងកាត់ប្រវត្តិសាស្រ្តជាច្រើនដំណាក់កាល ស្ថានទូតបារាំងប្រចាំកម្ពុជាបានតាំងនៅកន្លែងដដែលនេះអស់រយ:ពេលជាង៦០ឆ្នាំមកហើយៗស្ថិតក្នុងចំណោមសួនបៃតងដ៏ធំនៅចំកណ្តាលរាជធានីភ្នំពេញផងដែរ។
ក្នុងឱកាសពិសេសខាងលើ សាធារណជនអាចចូលទស្សនាអគារដ្ឋបាល រួមទាំងនិវេសនដ្ឋានលោកឯកអគ្គរដ្ឋទូត រួមទាំងសួនច្បារលម្អដោយដើមឈើទំហំ៤,៥ហិចតាផងដែរ។
បែបបទនៃការទស្សនា៖
- អ្នកទស្សនាត្រូវមកដល់ស្ថានទូតបារាំង ចន្លោះពីម៉ោង៩៖០០ និងម៉ោង១២៖០០ និងពីម៉ោង១៤៖០០ ដល់ម៉ោង១៦៖៣០។ បន្ទាប់ពីការចេញដំណើរទស្សនារបស់ក្រុមនីមួយៗ រយៈពេលរង់ចាំមានប្រមាណ២០នាទី។ ការទស្សនារបស់ក្រុមនីមួយៗមានរយៈពេលប្រហែល៣០នាទី ដោយមានការរៀបរាប់ពន្យល់ជាភាសាបារាំង ខ្មែរ និងអង់គ្លេស។ ការទស្សនាអមដោយការពន្យល់រៀបរាប់ជាភាសាជប៉ុននឹងប្រព្រឹត្តទៅនៅម៉ោង១១ព្រឹក។
- អ្នកទស្សនាម្នាក់ៗត្រូវបង្ហាញឯកសារសម្គាល់ខ្លួននៅពេលចូលស្ថានទូត។
- អ្នកទស្សនានឹងមិនត្រូវអនុញ្ញាតអោយចូលស្ថានទូតជាមួយយានជំនិះនោះទេ។
- ក្មេងអាយុក្រោម១២ឆ្នាំ មិនអនុញ្ញាតអោយចូលទស្សនាឡើយ។
- អ្នកដែលមានកាយសម្បទាជើងមិនគ្រប់គ្រាន់មិនអាចចូលទស្សនាឧទ្យានស្ថានទូតបានទេ។
- កាបូបធំៗ នឹងមិនត្រូវបានអនុញ្ញាតអោយយកចូលឡើយ ហើយកាបូបទាំងអស់នឹងត្រូវត្រួតពិនិត្យមើល។
- ក្រុមទស្សនានឹងដើរទៅតាមទិសដៅកំណត់ ហើយអ្នកជូនភ្ញៀវទស្សនាត្រូវធានាថាភ្ញៀវទស្សនាស្ថិតនៅជុំគ្នា។
- ការថតរូប(ដោយប្រើម៉ាស៊ីនថត ឬទូរស័ព្ទដៃ) នឹងត្រូវអនុញ្ញាតតែក្នុងកន្លែងមួយចំនួនប៉ុណ្ណោះ រួមមាន៖ ទីធ្លាការិយាល័យស្ថានអធិការបតី ផ្ទាំងថ្មផ្នូរ ក្លោងទ្វារសល់ពីសម័យមុន (ហាមថតផ្នែកខាងក្រៅនៃនិវេសនដ្ឋានចេញពីកន្លែងនេះ) កន្លែងទទួលភ្ញៀវ និងកន្លែងទទួលទានអាហារនៃនិវេសនដ្ឋាន ដោយអាចថតរូបបែរទៅរកសួនច្បារ)។ ពុំអនុញ្ញាតអោយថតរូបផ្នែកខាងក្រៅអគារនោះទេ នៅពេលធ្វើដំណើរពីកន្លែងមួយទៅកន្លែងមួយ។
ដោយ ៖ គន្ធា