ខឹងប្តីមានស្រី ប្រពន្ធដើរបាចលុយចោល តាមដងផ្លូវ

កាលពីល្ងាចថ្ងៃទី 14/7/2013 នៅលើដងផ្លូវ Highway ឯ Chongqing ប្រទេសចិន បានលេចចេញនូវស្រ្តី មានឬកពារចម្លែកម្នាក់។ បុគ្គលិកគ្រប់គ្រងដងផ្លូវ Highway នៅ Chongqing បានឲ្យដឹងថាក្នុងពេលគាត់កំពុងតែដើរត្រួតពិនិត្យនៅលើផ្លូវ Highway ត្រង់ចំនុច G65 បានឃើញស្រ្តីម្នាក់ពាក់វែនតា ស្លៀកពាក់ស្អាតបាត បានដើរបណ្តើរ និងយកលុយចេញពីកាបូប បាចចោលបណ្តើរ។

ពេលគាត់ដើរទៅជិតសួរស្រ្តីម្នាក់នោះ នាងមិនបានឆ្លើយតបអ្វីទាំងអស់ និងនៅតែបន្តបាចលុយចោលដដែល។ ព្រោះតែបារម្ភ ខ្លាចមានរឿងអ្វីកើតឡើងនៅលើផ្លូវ Highway គាត់បានទូរស័ព្ទហៅបុគ្គលិកម្នាក់ទៀតមកជួយឃាត់នាង ចំណែកគាត់បានដើរប្រមូលលុយ នាងបានបាចចោលបានសរុបជិត 300 Yuan (ប្រហែល 50$) ។

នៅពេលដែលសួរជីករកមូលហេតុម្តងហើយ ម្តងទៀត ស្រ្តីម្នាក់នោះមិនបាននិយាយអ្វីច្រើនទេដោយនិយាយយ៉ាងខ្លីថា មកពីប្តីមានស្រីនៅក្រៅ ធុញថប់អារម្មណ៍ខ្លាំង មកទីនេះដើម្បីបំបាត់ស្រ្តេស។ បុគ្គលិកពីរនាក់នោះ ចង់នាំស្រ្តីនោះចេញពីរផ្លូវ Highway តែនាងមិនព្រមឡើយ ហើយទាមទារ ចង់ដើរតែម្នាក់ឯង។ គ្មានជម្រើសណាផ្សេង បុគ្គលិកម្នាក់ បានដើរកំដរនាង រហូតដល់អស់មួយកំណាត់ផ្លូវ។