នៅពេលថ្មីៗនេះ រូបភាពវីដេអូ និងរូបថត ដែលចោទថា កម្លាំងអាវុធហត្ថបានយកគ្រឿងញៀនទៅដាក់ក្នុងហោប៉ៅរបស់យុវជនម្នាក់ ក្រោយពីឆែកឆេរមិនឃើញអ្វីនោះ ត្រូវបានបង្ហោះ និងផ្សព្វផ្សាយតៗគ្នា តាមបណ្តាញអ៊ីនធឹណែត បានក្លាយទៅជាពត៌មានដ៏ក្តៅគគុកបំផុត។
ខ្លីបវីដេអូដែលមានរយៈពេល២នាទី និង២៥វិនាទីបានបង្ហាញឲ្យឃើញពីកងរាជអាវុធហត្ថ បានឈរកកកុញ ចោមរោមឃាត់ខ្លួនយុវជនម្នាក់ហើយឆែកឆេរអស់រយៈពេលមួយសន្ទុះ ប្រហែលមិនឃើញមានភស្តុតាងអ្វីផ្ទុយនឹងច្បាប់នោះទេ។ បន្ទាប់មក មន្ត្រីកងរាជអាវុធហត្ថម្នាក់បានយកវត្ថុម្យ៉ាងដែលគេសង្ស័យថា ជាថ្នាំញៀន ញាត់ចូលក្នុងហោប៉ៅខោក្រោយរបស់ជនសង្ស័យ។
តាមប្រភពព័ត៌មានកាសែតដើមអំពិលបានឲ្យដឹងថា យុវជននេះឈ្មោះ សោម សុម៉ុច អាយុ ២៥ឆ្នាំ រស់នៅក្នុងប្លុកបុរីកីឡា បានរៀបរាប់រឿងរ៉ាវទាំងនេះ នៅយប់ថ្ងៃទី០៤ ខែមិថុនា ឆ្នាំ២០១២នេះថា តាមពិតទៅកម្លាំងរាជអាវុធហត្ថ ដែលបានឃាត់សួរនាំនោះ គឺមិនបានដាក់គ្រឿងញៀននៅក្នុងហោប៉ៅ ដូចដែលការចោទប្រកាន់របស់ក្រុមមនុស្សមួយចំនួនតាមប្រព័ន្ធសង្គម Facebook នោះទេ។ យុវជនរូបនេះ បានបញ្ជាក់យ៉ាងច្បាស់ថា តាមពិតមន្ត្រីកងរាជអាវុធហត្ថបានដាក់ក្រដាស សមួយសន្លឹកនៅក្នុងហោប៉ៅក្រោយរបស់ខ្លួន គឺជាក្រដាស់កត់លេខទូរស័ព្ទរបស់ខ្លួន មិនមែនដាក់គ្រឿងញៀន ដូចអ្វីដែលបានផ្សព្វផ្សាយឡើយ។
ប៉ុន្តែចម្លើយនេះ ហាក់ដូចជាមិនធ្វើឲ្យអ្នកលេងអ៊ីនធឹណែតស្ងប់ចិត្តបានឡើយ ដោយមានការសង្ស័យជាច្រើនទៀតកើតឡើង។
គួររំលឹកថា ការចុះឃាត់ខ្លួនជនសង្ស័យនោះ ត្រូវបានធ្វើឡើងនៅក្នុងទឹកដីបូរីកីឡានៃខណ្ឌ៧មករា កាលពីវេលាម៉ោង១ រំលងអធ្រាត្រឈានចូលថ្ងៃទី៣០ ខែឧសភា ឆ្នាំ២០១២ នៅចំណុចផ្លូវលេខ២១១ក្នុងសង្កាត់វាលវង់ ខណ្ឌ៧មករា។ តាមប្រភពព័ត៌មានកម្ពុជាថ្មី បានឲ្យដឹងថា នៅមុនពេលកើតហេតុនោះ មានការផ្ទុះអាវុធមួយកើតឡើង។ ក្រោយពេលកើតហេតុ មន្ត្រីកងរាជអាវុធហត្ថប្រចាំការនៅក្បែរនោះ ក៏បានចុះដល់កន្លែងកើតហេតុ ហើយរកឃើញសំបកគ្រាប់កាំភ្លើងម៉ាក k-54 ចំនួន១គ្រាប់។ ប៉ុន្តែមិនបានរកឃើញជនសង្ស័យជាអ្នកបាញ់នោះទេ។ ប៉ុន្តែពេលនោះជនសង្ស័យដែលមានសភាពស្រវឹងម្នាក់ ត្រូវបាន កងរាជអាវុធហត្ថឃាត់ខ្លួនសួរនាំ៕
ដោយ៖ មិនា