អន្តរជាតិ ៖ បើតាមការអោយដឹងពីរបាយការណ៍ ដែលបានចេញផ្សាយដោយគេហទំព័រសារព័ត៌មានបរទេស Dailymail បានអោយដឹងថា ថ្មីៗនេះ ប្រទេសអូស្ត្រាលីបានប្រារព្ធពិធីបង្ហោះខ្លែងក្នុងឱកាសបុណ្យវាយោប្រចាំឆ្នាំ The Festival of The Winds 2012 ។
គួរបញ្ជាក់ផងដែរថា នៅក្នុងឱកាសពិធីបុណ្យប្រចាំឆ្នាំមួយនេះ គេឃើញមាន ខ្លែងធំៗជាច្រើនត្រូវបានបង្ហោះឡើងនៅតាមបណ្តោយមាត់ឆ្នេរ នាទីក្រុងស៊ីដនី ដែលវាគឺជាភាពទាក់ទាញមួយដ៏អស្ចារ្យ ស្របពេលដែលពួកវាទាំងនោះ ត្រូវបានច្នៃប្រឌិតជារូបរាងសត្វផ្សេងៗគួរអោយគយគន់។
តាមធម្មតា សត្វត្រីបាឡែនតែងមានប្រជាប្រិយភាពនៅក្នុងផ្ទៃសមុទ្រ ចំពោះសកម្មភាពហែលទឹករបស់វា។ តែទម្រង់រូបរាងត្រីបាឡែននេះ ក៏ត្រូវបានគេយកមកកែច្នៃជារូបខ្លែងដាក់ហោះហើរនៅលើអាកាសតាមតំបន់ឆ្នេរខ្សាច់សមុទ្រ ដែលសឹងតែមើលទៅដូចត្រីបាឡែនពិតៗ។
ជាក់ស្តែងគេឃើញមាននៅឯតំបន់ឆ្នេរសមុទ្រ នៃទីក្រុងស៊ីដនីប្រទេសអូស្រ្តាលី ។ រូបខ្លែងដែលបង្ហោះនោះមានរាងជាសត្វត្រីបាឡែនយក្សតែម្តង ហើយមានប្រវែងជិត៣០ម៉ែត្រឯណោះ។ មិនត្រឹមតែខ្លែងយក្ស ដែលមានរាងជាសត្វត្រីបាឡែនប៉ុណ្ណោះទេ តែក៏មានបណ្តាខ្លែងដែលមានរូបរាងជាសត្វផ្សេងៗទៀត ត្រូវបានបង្ហោះនៅក្នុងឱកាសពិធីបុណ្យប្រចាំឆ្នាំមួយនេះផងដែរ។
ដើម្បីអោយជ្រាបកាន់តែច្បាស់ថាតើ ទិដ្ឋភាពរួមនាពេលនោះ មានភាពទាក់ទាញយ៉ាងណានោះ សូមតាមដានទស្សនានូវបណ្តារូបមួយចំនួននៅខាងក្រោមនេះបន្តិចទៅ ៖
ដោយ ៖ ពិសីប្រភព ៖ Dailymail