ប្លែកៗ ៖ ហេតុតែស្រឡាញ់កូនតុក្តតា Barbie ពេក ចំណាយពេលដល់ទៅជិត ២០ ឆ្នាំ ប្រមែរប្រមូលតុក្តតា Barbie បានដល់ទៅ ១៥,០០០ នឹងបានបំបែកឯតទគ្គកម្មពិភពលោកឆ្នាំ ២០១៣នេះបើតាមរបាយការណ៍ដែលបានចេញផ្សាយដោយគេហទំព័រសារព័ត៌មានប្លែក អូដីធី ។
គួរបញ្ជាក់ផងដែរថា អ្នកដែលបានបំបែកឯតទគ្គកម្មពិភពលោកឆ្នាំ ២០១៣ រូបនេះត្រូវបានរកអោយឃើញថា ជាស្ត្រីចំណាស់ វ័យ៥២ឆ្នាំ សក់ពណ័ទង់ដែង នឹងមានឈ្មោះថា Bettina Do-rfmann ដែលបានមកពីតំបន់ Dusseldorf ភាគខាងលិចប្រទេសអាល្លឺម៉ង់។
លើសពីនេះទៅទៀត របាយការណ៍ដដែលក៏បានបញ្ជាក់បន្ថែមផងដែរថា លោកស្រី Bettina Dorfmann បានចាប់ផ្ដើមទិញកូនក្រមុំជ័រនេះ តាំងពីឆ្នាំ១៩៩៣ រហូតមកទល់សព្វថ្ងៃ ដោយបានចំណាយប្រាក់សរុបមិនតិចជាង ៣០ ម៉ឺនដុល្លារនោះទេ។
គួររំឮកផងដែរថា លោកស្រី Bettina គឺជាមនុស្សតែម្នាក់គត់ក្នុងលោកដែលមានតុក្កតាកូនក្រមុំបាប៊ីច្រើនជាងគេធ្វើឲ្យផ្ទះបាយ បន្ទប់គេង បន្ទប់ទទួលភ្ញៀវ និងកន្លុកកន្លៀតក្នុងផ្ទះចាក់គរទៅដោយកូនក្រមុំជ័រទាំងនេះ។លោកស្រីក៏បានបើកហាងទទួលជួសជុលកូនក្រមុំជ័រ ផ្ញើមកពីគ្រប់ទិសទីក្នុងពិភពលោក។ ក្នុងចំណោមតុក្កតាទាំងអស់របស់អ្នកស្រី មាន ៣០០០ កូនក្រមុំជ័រត្រូវបានគេយកទៅដាក់តាំងនៅសារមន្ទីរនៅ អាស៊ី និងអឺរ៉ុប។
មិនត្រឹមតែប៉ុណ្ណោះ លោកស្រីបានបញ្ជាក់យ៉ាងច្បាស់ថា ៖ « ខ្ញុំប្ដេជ្ញាថា នឹងមិនឈប់ប្រមូលទិញតុក្កតាបាប៊ីឡើយ ដរាបណាខ្ញុំនៅមានដង្ហើមរស់»៕
ដោយ ៖ ពិសីប្រភព ៖ Oddity