អច្ឆរិយវត្ថុរបស់ខ្មែរ (ភាគទី ៤)៖ វត្តឧបោសថរតនារាម ឬវត្តព្រះកែវ ឬវត្តប្រាក់

វត្តប្រាក់មានទីតាំងឋិតនៅទីធ្លាខាងត្បូងនៃព្រះបរមរាជវាំង ក្នុងទីក្រុងភ្នំពេញ ដែលមានឈ្មោះពេញហៅថាវត្តឧបោសថរតនារាម ដែលមានវិហារហៅថា ព្រះវិហារព្រះកែវមរកត ឬត្រូវបានគេហៅម្យាងទៀតថាវត្តព្រះកែវ។ ព្រះវិហារនៃវត្តនេះមានតម្កល់ទុកនូវសម្បតិ្តជាតិជាច្រើនដូចជាមាស ពេជ្រ និងមានព្រះពុទ្ធរូបធ្វើពីមាស ពេជ្រជាច្រើនហើយដែលមានឈ្មោះល្បីជាងគេបំផុតនោះគឺព្រះពុទ្ធរូបដែលធ្វើពីមរកត ក្នុងសតវត្សទី ១៧ និងព្រះពុទ្ធរូបទំហំប៉ុនមនុស្សដែលធ្វើពីមាសដាំពេជ្រចំនួន ៩៥៨៤គ្រាប់ហើយគ្រាប់ដែលធំជាងគេគឺមានទំហំ ២៥ ការ៉ាត់ ដែលព្រះពុទ្ធរូបនេះត្រូវបានកសាងក្នុងរោងជាងព្រះបរមរាជវាំងអំឡុងឆ្នាំ ១៩០៦ ទៅ ១៩០៧ ព្រះពុទ្ធរូបមាសនេះមានទម្ងន់ ៩០ គីឡូក្រាម។ហើយានៅមានព្រះពុទ្ធរូបនិងរបស់មានតម្លៃជាច្រើនដែលត្រូវបានប្រមូលមកពីប្រទេស ស្រីលង្កាដោយម្ចាស់ក្សត្រីកុសុមៈនារីរ័ត្ន។

ក្នុងរជ្ជកាលព្រះបាទនរោត្តមសីហនុ មុនរបបខ្មែរក្រហមវត្តនេះត្រូវបានគេបិតជាមួយនឹងសន្លឹកប្រាក់ច្រើនជាង ៥០០០ សន្លឹកហើយកម្រនឹងបើកជូនភ្ញៀវចូលទស្សនាណាស់។

ទីកន្លែងផ្សេងៗនៃវត្តប្រាក់

គំនូររឿង រាមកេរ្តិ៍ ផ្ទៃនៃជញ្ជាំងត្រូវបានគេរចនាជាមួយនឹងគំនូររឿងរាមកេរ្តិ៍តាមទម្លាប់វត្តអារាមខ្មែរ។តែមានផ្នែកខ្លះវាបានរលុបដោយសារតែភាពចាស់រិល និងបរិបទអាកាសធាតុ ការគូរគំនូរជាសាច់រឿងរាមកេរ្តិ៍នេះបង្ហាញពីទស្សនៈដែលខ្មែរទទួលការហូរចូលពុទ្ធសាសនាបែបឥណ្ឌា។ គំនូរទាំងនេះត្រូវបានគូរដោយសិស្សសាលាវិចិត្រជាក្នុងឆ្នាំ ១៩០៣-១៩០៤ ក្រោមការដឹកនាំរបស់វិចិត្រករអ្នកឧកញ៉ា ទេពនិមិត្ត។