រុស្ស៊ីកាន់ទុក្ខអ្នកស្លាប់ក្នុងគ្រោះទឹកជំនន់

ប្រធានាធិបតិ រុស្ស៊ី លោក Vladimir Putin បានប្រកាសថា ថ្ងៃនេះគឺជាថ្ងៃកាន់ទុក្ខរបស់ជាតិ សម្រាប់ប្រជាជន ១៥០នាក់ដែលបានស្លាប់ដោយគ្រោះទឹកជំនន់ នៅភាគខាងត្បូង និងបានបញ្ជាអោយធ្វើការស្រាវជ្រាវទៅលើអាងស្ដុកទឹកមួយចំនួនដែលអាចជាមួលហេតុមួយ ដែលបង្កអោយមានទឹកជំនន់នេះ។

ស្ថាប័នសារព័ត៌មានរបស់វិមាន Kremlin ប្រកាសថា ៖ រដ្ឋភិបាលបានស្នើទៅដល់អង្គភាពវប្បធម៌ស្ថានីយទូរទស្សន៍នានា មិនអោយធ្វើកម្មវិធីកំសាន្ដ។

យោងតាមបទបញ្ជារបស់ប្រធានាធិបតិរុស្ស៊ី ទង់ជាតិនៃប្រទេសរុស្ស៊ី នៅក្នុងស្រុក ក៏ដូចជានៅស្ថានទូតរបស់ខ្លួនឯបរទេស នឹងត្រូវបានបង្ហូតត្រឹមពាក់កណ្ដាលដងទង់ នៅក្នុងថ្ងៃកាន់ទុក្ខនេះ។

នៅក្នុងគ្រោះទឹកជំនន់ដ៏សាហាវ ដែលបានកើតឡើងកាលពីថ្ងៃទី ៦កាក្កដា កន្លងទៅ បណ្ដាលអោយមនុស្សយ៉ាងហោច ១៥០នាក់ត្រូវបាត់បង់ជីវិត។ សារព័ត៌មាន Interfax ​បានផ្សាយថា ចំនួននេះ អាចឡើងដល់ ១៧០នាក់។

ក្រៅពីមនុស្សស្លាប់ ទឹកជំនន់នេះ ក៏បានធ្វើអោយផ្ទះចំនួន ៥.០០០ខ្នងត្រូវលិច និងខូចខាតផងដែរ។ ចំណែកសេវាកម្មផ្គត់ផ្គង់អគ្គីសនី ប្រេងសាំង ទឹក ទូរគមនាគមន៍ ជាដើម ក៏ត្រូវបានអាក់ខានដោយសារទឹកជំនន់។

រដ្ឋភិបាលរុស្ស៊ី បានចេញបញ្ជាអោយធ្វើការស្រាវជ្រាវទៅលើអាងស្ដុកទឹកមួយចំនួន ដែលអាចជាមួលហេតុមួយ រួមចំណែកបង្កអោយមានទឹកជំនន់នេះ៕

ដោយ ៖ សូរីយ៉ាប្រភព ៖ VE