ស្ទើរតែមិនគួរអោយជឿ ៖ យោងតាមការដកស្រង់អត្ថបទផ្សាយ ពីគេហទំព័រសារព័ត៌មានបរទេស ស្កាយ អោយដឹងថា អ្នកសម្អាតនៅលើយន្តហោះម្នាក់ បានរកឃើញដុំមាសដល់ទៅ ២៤ ដុំ នៅឯក្នុងបន្ទប់ទឹក លើយន្តហោះមួយគ្រឿង ខណៈពេលដែលដុំមាសទាំងអស់នោះ មានតម្លៃស្មើនឹង ១ លានដុល្លារ។
ដោយឡែក យន្តហោះមួយគ្រឿងនោះ គឺជាកម្មសិទ្ធរបស់ក្រុមហ៊ុនអាកាសចរណ៍ Jet Airways ត្ រូវបានបុគ្គលិកជាអ្នកបម្រើរកឃើញដុំមាសទាំងអស់នោះ ខណៈពេលដែលឈប់សម្រាកសម្អាតនៅឯអាកាសយានដ្ឋានអន្តរជាតិ Kolkata airport កាលពីថ្ងៃអង្គារកន្លងទៅនេះ នៅក្នុងប្រទេសឥណ្ឌា ពោលគឺ ក្រោយពីធ្វើដំណើរហោះហើររបស់ខ្លួនពីភាគខាងកើតក្រុង Patna ។
លោក BP Mishra ជាប្រធាននាយកប្រចាំអាកាសយានដ្ឋានអន្តរជាតិមួយនេះ អះអាងអោយដឹងថា ដុំមាសទាំង ២៤ ដុំ មានទម្ងន់ ១ គ.ក លើកនេះ ត្រូវបានគេប្រទះឃើញនៅក្នុងកាបូបពីរ ទុកចោលនៅក្នុងបន្ទប់ទឹកយន្តហោះ ។ បន្ថែមពីលើនេះ ប្រភពពីអាកាសយានដ្ឋានមួយនេះ បញ្ជាក់ថា មិនទាន់មាននរណាម្នាក់ ចេញមុខអះអាងថា ដុំមាសទាំងនេះ ជារបស់ខ្លួននៅឡើយនោះទេ ហើយក៏ពុំទាន់មានករណីចាប់ឃាត់ខ្លួនបុគ្គលណាមួយនោះ ដូចគ្នាដែរ។
ឥណ្ឌា គឺជាប្រទេសមានការប្រកួតប្រជែងជាខ្លាំង ជាមួយនឹងប្រទេសចិន ខណៈអតិថិជនមាសដ៏ធំបំផុតក្នុងពិភពលោក ស្របពេលដែលប៉ុន្មានខែចុងក្រោយនេះ គេអាចមើលឃើញដោយផ្ទាល់ភ្នែកបានថា មានករណីរត់ពន្ធជាច្រើនផងដែរ។ គួររំឭកផងដែរថា ក្នុងឆ្នាំនេះ ពន្ធនាំចូល ត្រូវបានតម្លើងដល់ទៅបីដង ដើម្បីជាការទប់ស្កាត់នូវតំរូវការដ៏គំហុករបស់ប្រទេសនេះ៕
ប្រែសម្រួល ៖ កុសលប្រភព ៖ ស្កាយ