(កូរ៉េ)៖ លោក Park Bo Gum និងនាង Kim Yoo Jung បានចេញមុខថ្លែងអំណរគុណ ដល់អ្នកគាំទ្រ ដែលបានបង្ហាញក្តីស្រឡាញ់ ដល់ពួកគេអស់ពីបេះដូង និងបានចំណា យពេលវេលាទស្សនា ខ្សែភាពយន្តភាគកូរ៉េដ៏ល្បី របស់ទូរទស្សន៍ KBS គឺរឿង«Moonlight Drawn by Clouds»។
តាមរយៈរូបភាពវីដេអូមួយ របស់តួអង្គប្រុសស្រីទាំងពីរ ដែលបង្ហោះដោយ KBS កាលពី ថ្ងៃទី១៤ កញ្ញា កន្លងទៅ ពួកគេបានបង្ហាញអារម្មណ៍រំភើប និងរីករាយជាខ្លាំង ព្រោះយ៉ាងហោចណាស់ ក៏មានអ្នកទស្សនាប្រមាណ ២០% បញ្ចេញពីបេះដូងពិត នៃការគាំទ្រដល់ខ្លួន ហើយសង្ឃឹមថា អ្នកគាំទ្រនឹងពេញចិត្ត ការសម្តែងរបស់ពួកគេគ្រប់ឈុតឆាក។
តារាស្រីវ័យក្មេងដ៏ស្រស់ស្អាត Kim Yoo Jung និយាយថា សាច់រឿង «Moonlight Drawn by Clouds» មិនធ្វើឲ្យអ្នកគាំទ្រខកចិត្តទេ ហើយធានាថា អ្នកទស្សនានឹងមិនប្តូរប៉ុស្តិ៍ទៅណាឡើយ។ មិនតែប៉ុណ្ណោះតារាស្រីរូបនេះ បញ្ជាក់ថា វាពិតជាមានការលំបាកច្រើន កាលពីចាប់សម្តែងលើកដំបូង តែយ៉ាងណានាង និងតារាប្រុសស្រីដទៃទៀត តស៊ូថតខ្សែភាពយន្តនេះ រហូតសម្រេចបានជោគជ័យ។
នាង Kim Yoo Jung បានសរសើរតួប្រុស Park Bo Gum ថាជាសុភាពបុរស ហើយការរាប់អានគ្នា រវាងពួកគេប្រៀបដូចជាបងប្អូនអ៉ីចឹង ដោយគេបានជួយណែនាំ និងមិនចេះកេងចំណេញលើតួស្រីឡើយ៕
ផ្តល់សិទ្ធិដោយ ៖ ខ្មែរថកឃីង