មេបញ្ជាការជាន់ខ្ពស់៥រូបរបស់អង្គការរដ្ឋអ៊ីស្លាម បានឱបប្រាក់រត់គេចខ្លួនពីខែត្រ Nineveh ភាគខាងជើងអ៊ីរ៉ាក់។
ទំព័រ Sputniknews កាលពីម្សិលមិញបានដកស្រង់ប្រភពព័ត៌មានពីទូរទស្សន៍ Al Sumaria របស់អ៊ីរ៉ាក់ ឱ្យដឹងថា “មេបញ្ជាការជាន់ខ្ពស់៥រូប ក្នុងនោះមានមេបញ្ជាការម្នាក់ត្រូវបានគេស្គាល់ឈ្មោះថា Abu Bara Kakhtani ទទួលខុសត្រូវក្នុងការគ្រប់គ្រងប្រាក់របស់ក្រុម ISIS បានរត់គេចខ្លួន ខណៈដែលប្រាក់មួយចំនួនធំក៏បានបាត់ស្រមោលពីឃ្លាំង”។
ទឹកប្រាក់ដែលបណ្ដាមេបញ្ជាការ ISIS ប្រមូលយកទៅតាមខ្លួន មានចំនួនដល់ទៅរាប់លានដុល្លារ
យោងតាមទូរទស្សន៍នេះ ទឹកប្រាក់ដែលមេបញ្ជាការទាំងនេះបានប្រមូលយក មានចំនួនឡើងដល់រាប់លានដុល្លារអាមេរិក។ ISIS គ្រោងនឹងប្រើប្រាស់ប្រាក់ទាំងនេះ ដើម្បីបើកប្រាក់ខែឱ្យក្រុមសកម្មប្រយុទ្ធ។
បច្ចុប្បន្ន យោងតាមប្រភពព័ត៌មានមួយចំនួន ក្រុមមេបញ្ជាការខាងលើ កំពុងឆ្ពោះទៅកាន់ទីក្រុង Tal Afar ដើម្បីទៅកាន់ទីរួមស្រុក Baa'j រួចក្រោយមក ឆ្ពោះទៅកាន់ស៊ីរី។ ISIS បានចេញបញ្ជាឱ្យតាមចាប់បន្ទាន់ និងប្រហារជីវិតអ្នកដែលបានរត់គេចខ្លួន។
ហេតុការណ៍នេះបានកើតឡើងក្នុងពេលដែលកងទ័ពអ៊ីរ៉ាក់ ដោយមានជំនួយពីកងទ័ពជនជាតិ Kurd និងកងទ័ពសម្ព័ន្ធមិត្តដែលដឹកនាំដោយអាមេរិក កំពុងបន្តវាយប្រហារដើម្បីរំដោះក្រុង Mosul ទាំងស្រុងចេញពីកណ្ដាប់ដៃ ISIS ។
ប្រែសម្រួល ៖ តារាប្រភព ៖ Sputniknews