អ្នកចម្រៀងខ្មែរល្បីឈ្មោះលើឆាកអន្តរជាតិ អ្នកនាង កាក់ ចន្ធី រើខ្លួនពីភាពក្រីក្រលំបាក ដើម្បីសម្ដែងឱ្យទស្សនិកជនទាំងក្នុង និងក្រៅប្រទេសបានទស្សនា។ ក្រុមតន្រ្ដីរបស់អ្នកនាង ដែលមានឈ្មោះថា Cambodia Space Project បានប្រែខ្លួនជាក្រុមតន្រ្ដី Rock កម្ពុជា ដែលបង្ហាញវត្ដមាន និងសម្ដែងនៅក្រៅប្រទេស។
-ឱកាសពិសេសសម្រាប់អ្នកចង់ផ្សាយពាណិជ្ជកម្ម នៅលើគេហទំព័រ Camnews
មណរភាពរបស់អ្នកនាងក្នុងវ័យ ៣៨ ឆ្នាំ កាលពីថ្ងៃអង្គារ នៅក្នុងគ្រោះរថយន្ដបុកជាមួយរម៉កកង់បី បានធ្វើឱ្យអ្នកគាំទ្រអ្នកនាងជុំវិញពិភពលោក រន្ធត់ចិត្ដ និងសោកស្ដាយជាខ្លាំង។
អតីតស្វាមីអ្នកនាង និងជាសហស្ថាបនិកក្រុមតន្រ្ដីខាងលើ លោក Julien Poulson បានប្រាប់ BBC ថា៖” តន្រ្ដី ទឹកដមសម្លេង ជីវិត និងរឿងរ៉ាវរបស់នាង ដក់ជាប់ក្នុងអារម្មណ៍មនុស្សជាច្រើនទូទាំងពិភពលោក”។
ការជម្នះភាពក្រីក្រ និងភាពលំបាកក្នុងជីវិត
អ្នកនាង កាក់ ចន្ធី មកពីគ្រួសារក្រីក្រនៅជនបទ ហើយអ្នកនាងធ្លាប់ជួបរឿងរ៉ាវជូរចត់ នៅក្នុងឆាកជីវិត ដែលជាក្មេងស្រីក្រីក្រ ធ្វើដំណើរចាកចេញពីជនបទមករកការងារធ្វើនៅទីក្រុងភ្នំពេញ។ នៅទីក្រុងភ្នំពេញ អ្នកនាង ធា្លប់ធ្វើការងារយ៉ាងលំបាក ដោយពេលខ្លះ អ្នកនាងរកប្រាក់កម្រៃបានមិនដល់ ១ ដុល្លារផងក្នុងមួយថ្ងៃ។
អ្នកនាងបានប្រាប់ BBC នៅក្នុងបទសម្ភាសន៍មួយកាលពីឆ្នាំ ២០១៧ ថា៖” នាងខ្ញុំធ្លាប់ច្រៀង នៅក្នុងបារខារ៉ាអូខេមួយ ប៉ុន្ដែនៅក្នុងឆ្នាំ ២០០៦ នាងខ្ញុំចង់មានអាជីពជាអ្នកចម្រៀងល្បីម្នាក់។ ដូច្នេះហើយ នាងខ្ញុំបានសុំអនុញ្ញាត ថៅកែហាងបៀរហ្គាដិនមួយ ដើម្បីបានច្រៀង។ ប៉ុន្ដែនៅពេលនោះ នាងខ្ញុំមានអារម្មណ៍ភ័យភ្លាំងណាស់ រហូតដល់ជ្រុះក្បាលមីក្រូពីដៃ។ សំណាងដែរ ដោយសារថ្ងៃនោះ ថៅកែហាង យល់ព្រមទទួលនាងខ្ញុំ ហើយសម្រេចចិត្ដជួលនាងខ្ញុំឱ្យច្រៀង ដោយឱ្យតម្លៃ ២ ដុល្លារក្នុងមួយថ្ងៃ”។
ហាងបៀរហ្គាដិននោះហើយ ជាកន្លែង ដែលតន្រ្ដីករសញ្ជាតិអូស្រ្ដាលី លោក Julien Poulson ជាប់ចិត្ដនឹងសម្លេងរបស់អ្នកនាង ហើយអ្នកទាំងពីរក៏បបួលគ្នា បង្កើតក្រុមតន្រ្ដី Cambodia Space Project នេះ។
លោក Scott Bywater ដែលលេងតន្រ្ដីជាមួយអ្នកនាងនៅក្នុងក្រុមតន្រ្ដីនេះ និងទៅលេងតាមការអញ្ជើញផងដែរនោះ បានប្រាប់ BBC ថា៖”អ្នកនាង ចន្ធី តែងយកលំនាំបទតារាចម្រៀងកំពូល ឆ្នាំ ១៩៦០ មកច្រៀងដូចជា រស់សេរី សុទ្ធា ប៉ែនរ៉ន និងស៊ិនស៊ីសាមុត្រជាដើម”។
គួររំលឹកថា សពរបស់តារាចម្រៀងស្រីរ៉ុកខេនរ៉ូលខ្មែរវ័យ ៣៨ ឆ្នាំ អ្នកនាងកាក់ ចន្ធី ដែលនិយមច្រៀងបទជាមរតកដើមនាទសវត្សរ៍ទី ៦០-៧០ និងមានក្រុមចម្រៀងជាមួយជនបរទេស ត្រូវបានដឹកយកទៅធ្វើបុណ្យតាមប្រពៃណីពុទ្ធសាសនា នៅឯស្រុកកំណើតខេត្តព្រៃវែង ក្រោយពីជួបគ្រោះថ្នាក់ចរាចរណ៍ ដោយរថយន្តម៉ាក Prius ពណ៌កណ្តុរប្រមេះ បុករម៉កកង់បីធ្លាក់ដួលបែកក្បាល ស្លាប់ភ្លាមៗ កាលពីវេលាម៉ោង ១ និង ៤០ នាទីយប់រំលងអាធ្រាត្រ ចូលថ្ងៃទី ២០ ខែមីនា ឆ្នាំ ២០១៨ នៅត្រង់ចំណុចបណ្តោយផ្លូវលេខ ១៦៣ ទិសដៅពីជើងទៅត្បូង (ផ្តុំភ្លើងស្តុបទួលទំពូង កែងនឹងផ្លូវនៅភោជនីដ្ឋានទន្លេបាសាក់ទី ១) ៕
អត្ថបទ៖ សារ៉ាត