ស្ទើរតែមិនគួរអោយជឿ ៖ បន្ទាប់ពីបានសរសេរសំបុត្ររកគ្នាដល់ទៅ ៣,០០០ សំបុត្រក្នុងរយៈពេល ៧០ ឆ្នាំ លោកយាយ Audrey Sims និងលោកយាយ Norma Frati ដែលត្រូវជាគូកនត្រូវរូវគ្នាបំផុតនោះ មិនដែលធ្លាប់បានជួបគ្នានោះទេ ទើបតែមកទល់នឹងបច្ចុប្បន្ននេះ ទើបបានជួបគ្នាជាលើកដំបូង។
ជាការពិត លោកយាយទាំងពីរនាក់នេះបានចាប់ផ្តើមទាក់ទងគ្នាជាមិត្តជិតស្និទ្ធតាមរយៈការសរសេរសំបុត្រ ចាប់តាំងពីឆ្នាំ១៩៤០មកម្ល៉េះ ពោលគឺបានកើតឡើងចេញពីគម្រោងរាប់អានមិត្តជិតសិទ្ធិរបស់សាលា ។ ក្រោយៗមកទៀត លោកយាយទាំងពីរនាក់ក៏បានសំរេចចិត្តក្នុងការរក្សាមិត្តភាពមួយនេះ ខណៈលោកយាយ Audrey Sims វ័យ ៨៣ ឆ្នាំរស់នៅឯប្រទេសអូស្រ្តាលី និង លោកយាយ Norma Frati វ័យ ៨៧ ឆ្នាំ រស់នៅរដ្ឋ តិចសាស់ សហរដ្ឋអាមេរិក។
បន្ទាប់ពីបានផ្តល់ជាកិច្ចសម្ភាសន៍ដល់ក្រុមសារព័ត៌មាន លោកយាយSims បានអះអាងអោយដឹងថា មិនត្រឹមតែមានទំនាក់ទំនងជិតស្និទ្ធ ក៏ដូចជាចំណូលចិត្តស្រដៀងគ្នានោះទេ តែលក្ខខ័ណ្ឌគ្រួសារក៏ដូចគ្នាផងដែរ នោះគឺ ពួកយើងទាំងពីរនាក់បានរៀបការសាជាថ្មី ក្រោយពីមានការលែងលះ ដូចគ្នានោះ។
ប្រភពសារព័ត៌មានដដែល បន្ថែមថា បន្ទាប់ពីមានដំណើរវិលត្រលប់ ទៅកាន់ប្រទេសអូស្រ្តាលីវិញ ក្រោយពីបានជួបគ្នាហើយនោះ លោកយាយទាំងពីរនាក់ នឹងបន្តទំនាក់ទំនងមួយនេះដដែល ពោលគឺ បន្តការសរសេរសំបុត្រអោយគ្នាទៅវិញទៅមក៕
ដោយ ៖ ពិសីប្រភព ៖ yahoo