ក្រុមក្មេងស្ទាវ ប្រុស ស្រី ជាង ១០នាក់ វាយយុវជន ២នាក់ ប្លន់យកម៉ូតូ ជិះរត់គេចខ្លួនបាត់

ភ្នំពេញ ៖ ក្រុមក្មេងស្ទាវ មានស្រី មានប្រុស ប្រមាណជាង១០នាក់ ជិះម៉ូតូ៥ទៅ ៦ គ្រឿង បានព្រួតវាយទៅលើ  យុវជនចំនួន  ២នាក់  ជិះម៉ូតូមួយគ្រឿង  ប្លន់យកដោយ សុវត្ថិភាព ខណ:យុវជនរង គ្រោះចេញពីក្លឹបអារីណា កាលពីវេលាម៉ោង ១រំលងអាធ្រាត្រ ឈានចូលថ្ងៃទី០៦ខែកញ្ញា ឆ្នាំ២០១៣ ស្ថិតនៅតាមបណ្តោយផ្លូវព្រះមុនីវង្សនៅវិទ្យាល័យបឹងត្របែក សង្កាត់ផ្សារដើមថ្កូវ ខណ្ឌចំការមន ។   

សមត្ថកិច្ចបានឲ្យដឹងថាយុវជន២ នាក់ខាងលើនេះទី ១ ឈ្មោះ ម៉ម រតនា ភេទប្រុស អាយុ ២៥ ឆ្នាំ  ស្នាក់នៅភូមិដើមស្លែង សង្កាត់ច្បារអំពៅទី២ ខណ្ឌមានជ័យ និង ទី ២ ឈ្មោះ រាជ ភេទប្រុស អាយុ ១៩ ឆ្នាំ ស្នាក់នៅភូមិជាមួយគ្នា ។ ម៉ូតូរបស់ពួកគេដែល ត្រូវក្រុមក្មេងស្ទាវព្រួតវាយយកទៅបាត់ខាងលើនេះម៉ាក វីវ៉ា ពណ៌ខ្មៅ ពាក់ស្លាកលេខ ភ្នំពេញ 1AK-2774 ។       

ជនរងគ្រោះបាននិយាយ រៀបរាប់ប្រាប់សមត្ថកិច្ចថា មុនពេលកើតហេតុ ពួកគេបានជិះម៉ូតូមួយគ្រឿង  ម៉ាកវីវ៉ា ចេញពីក្លឹបរាំកម្សាន្ត អារីណា ធ្វើដំណើរតាមបណ្តោយ ផ្លូវលេខ ៤៨៤ ឡើងទៅផ្លូវព្រះមុនីវង្ស  រហូតដល់ ចំណុចកើតហេតុ ស្រាប់តែមានក្រុមក្មេងស្ទាវប្រុសស្រីប្រមាណ១០ នាក់ ជិះម៉ូតូ ៥ទៅ ៦ គ្រឿង មកព័ទ្ធវាយទៅ  លើពួកគេ បណ្តាលឲ្យរងរបួសបែកមុខបែកមាត់ហើយក្រុមក្មេងស្ទាវខាងលើបានលើកម៉ូតូរបស់ជនរងគ្រោះជិះរត់គេចខ្លួនបាត់ដោយ សុវត្ថិភាព។

ក្នុងករណីនេះ ធ្វើឲ្យមានការភ្ញាក់ផ្អើលដល់នគរបាលមូលដ្ឋានចុះមកអន្តរាគមន៍ភ្លាមៗ ផងដែរប៉ុន្តែក្រុមជនសង្ស័យរត់គេចខ្លួនបាត់អស់ទៅហើយ។ប៉ុន្តែសមត្ថកិច្ចខណ្ឌចំការមនបានត្រឹមតែ ហៅជនរងគ្រោះ សួរនាំ និងដាក់ពាក្យបណ្តឹង នៅប៉ុស្តិ៍នគរបាលរដ្ឋបាលផ្សារដើមថ្កូវ ទុកជាឯកសារ សម្រាប់ធ្វើការស្រាវជ្រាវនាពេលក្រោយទៀត៕

ផ្តល់សិទ្ធិដោយ៖ ដើមអម្ពិល