នៅតាមបណ្ដោយព្រំដែនរវាង កូរ៉េខាងជើង និងកូរ៉េខាងត្បូង ពេលណាក៏មានស្ថានភាពតានតឹង ហើយវាប្រៀបបានទៅនឹងគ្រាប់បែកកំណត់ម៉ោង ដ៏គួរឱ្យភ័យខ្លាច ដូច្នេះ កងទ័ពរបស់កូរ៉េខាងត្បូង បានដាក់ពង្រាយទាយានយន្ដលំដាប់កំពូល នៅតំបន់ក្បែរព្រំដែនរបស់ប្រទេសទាំងពីរ។
ទាហានយន្ដ SGR-1 ដែលមានតួនាទី ការពារព្រំដែន របស់កូរ៉េខាងត្បូងនេះ ត្រូវបានផលិតឡើងដោយក្រុមហ៊ុនកូនមួយ ដែលស្ថិតក្រោមការគ្រប់គ្រងរបស់ Samsung។ ទាហានយន្ដទាំងនេះ ត្រូវបានបំពាក់ម៉ាស៊ីនតាមដានកំដៅ និងសកម្មភាព ដើម្បីស្វែងរកគោលដៅ ដែលស្ថិតនៅចម្ងាយ ឆ្ងាយជាង ៣,២គីឡូម៉ែត្រ។
ទាហានយន្ដនេះ ក៏មានបំពាក់កាំភ្លើងយន្ដ ៥,៥មម និងកាំភ្លើងផ្លោងគ្រាប់បែក ៤០មម បើទោះជាវា ត្រូវការមនុស្សម្នាក់ ដើម្បីធ្វើការសម្រេចថា នឹងចាប់ផ្ដើមប្រយុទ្ធ ឬមិនប្រយុទ្ធ។
គួររំលឹកថា ទាហានយន្ដខាងលើ ត្រូវបានសាកល្បងជាលើកដំបូង កាលពីឆ្នាំ ២០០៦។ អ្នកនាំពាក្យរបស់ក្រុមហ៊ុន Samsung Techwin (ជាក្រុមហ៊ុនកូនរបស់ Samsung) បានឱ្យកាលពីពេលនោះថា ៖ “ទាហានជាមនុស្ស អាចនឹងគេងលក់ដោយងាយ ឬការផ្ដោតអារម្មណ៍របស់ពួកគេនឹងថយចុះ ទៅតាមពេលវេលា។ ប៉ុន្ដែ បណ្ដាទាហានយន្ដទាំងនេះ មានប្រព័ន្ធត្រួតពិនិត្យដោយស្វ័យប្រវត្ត គឺពុំមានភាពខ្ជិលច្រអូសដូចមនុស្ស។ ពួកវាក៏មិនមានការភ័យខ្លាចអ្វីទាំងអស់ ចំពោះការវាយប្រហារពីសត្រូវ នៅជួរមុខ”។
បន្ទាប់ពីត្រូវបានដាក់ពង្រាយ បណ្ដាទាហានយន្ដទាំងនេះ នឹងមានមុខងារ បំពេញបេសកកម្មជាមួយក្រុមទាហានជាមនុស្ស នៅក្បែរតំបន់គ្មានកងទ័ព (DMZ) ដែលមានបណ្ដោយជាង ២៥៧គីឡូម៉ែត្រ និងទទឹងជាង ៤គីឡូម៉ែត្រ បែងចែកទឹកដី រវាងកូរ៉េទាំងពីរ៕
ប្រែសម្រួលដោយ ៖ តារាប្រភព ៖ Daily Mail