មិនគួរឲ្យជឿ ៖ វាសនារបស់បុរសពីររូប ត្រូវបានផ្លាស់ប្តូរ ក្រោយពេលមានការធ្វេសប្រហែសនៅឯមន្ទីរពេទ្យ ដែលពួកគេបានកើត។ កូនប្រុសច្បងក្នុងត្រកូលគ្រួសារអ្នកមាន បានក្លាយទៅជាកូនប្រុសពៅនៃគ្រួសារអ្នកក្រ ដែលទទួលជំនួយពីរដ្ឋាភិបាល ដើម្បីចិញ្ចឹមជីវិត។
ក្រោយពេលបញ្ចប់អនុវិទ្យាល័យ គាត់មានផលវិបាកក្នុងការស្វែងរកការងារធ្វើ ហើយបានរស់នៅក្នុងជីវភាពដ៏លំបាករយៈពេល ៦០ ឆ្នាំ។
ចំណែកឯបុរសម្នាក់ទៀត រស់នៅក្នុងកម្រិតជីវភាពដ៏ល្អ បានបញ្ចប់ថ្នាក់មហាវិទ្យាល័យ និងមានក្រុមហ៊ុនអចលនទ្រព្យមួយ។ ក្រោយមកប្អូនៗ ក្នុងគ្រួសារអ្នកមាន បានធ្វើការតេស្តិ៍ DNA ព្រោះតែពួកគេមានអារម្មណ៍ថា «បងប្រុសធំ» របស់ពួកគេ មានរូបរាងខុសពីពួកគេខ្លាំងពេក។
ដូច្នេះ ជីវិតរបស់បុរសទាំងពីរត្រូវបានផ្លាស់ប្តូរ ព្រោះតែការធ្វេសប្រហែសរបស់មន្ទីរពេទ្យកាលពី ៦០ ឆ្នាំមុន។
បុរសដែលរស់នៅក្នុងគ្រួសារអ្នកក្រ បានប្តឹងមន្ទីរពេទ្យ ដោយទទួលបានការសងជំងឺចិត្ត ៤០០.០០០ ដុល្លារ។ គាត់បានប្រាប់អ្នកសារព័ត៌មានថា៖ «តាមពិត ខ្ញុំពិតជាចង់ត្រឡប់ទៅកាលពី៦០ ឆ្នាំមុន។ ខ្ញុំមានអារម្មណ៍សោកស្តាយ និងខឹង។ ខ្ញុំចង់ឲ្យពួកគេត្រឡប់ពេលវេលាថយក្រោយ។»
ក្រោយពីដឹងការពិត ប្អូនៗ គ្រួសារអ្នកមាន បានជួបជាមួយបងប្រុសបង្កើតរបស់ពួកគេ ដើម្បីកសាងទំនាក់ទំនងដែលបានបាត់បង់ ៕
ប្រែសម្រួល ៖ High
ប្រភព ៖ Koreaboo