ក្រុមហ៊ុន Apple នឹងដាក់ឱ្យប្រើប្រាស់ជាផ្លូវការនូវប្រព័ន្ធប្រតិបត្តិ iOS 8.4 នៅវេលាម៉ោង ៨ព្រឹក ថ្ងៃទី ៣០មិថុនាឆ្នាំ ២០១៥ ម៉ោងនៅអាមេរិក (ម៉ោង ២២យប់នៅកម្ពុជា)។
ថ្មីៗនេះ លោក Lan Rogers អគ្គនាយក Apple Music បានប្រកាសជាផ្លូវការអំពីពេលវេលាជាក់លាក់ក្នុងការឧទ្ទេសនាមផលិតផលថ្មីរបស់ Apple ។ សេចក្ដីប្រកាសឱ្យដឹងថា iOS 8.4 នឹងត្រូវបានដាក់ឱ្យដំណើរការនៅវេលាម៉ោង ៨ព្រឹក ថ្ងៃទី ៣០មិថុនាឆ្នាំ ២០១៥ ម៉ោងនៅអាមេរិក ដែលត្រូវនឹងម៉ោង ២២យប់ នៃថ្ងៃទី ៣០មិថុនា នៅកម្ពុជា)។ ដើម្បីដឹងច្បាស់អំពីពេលវេលាជាក់លាក់ក្នុងតំបន់និមួយៗលើពិភពលោក សូមមើលរូបភាពខាងក្រោម ៖
ទន្ទឹមនឹងនេះ Beats 1 ដែលជាសេវាកម្មវិទ្យុ ២៤/៧ របស់ក្រុមហ៊ុន Apple ក៏នឹងត្រូវបានដាក់ឱ្យប្រើប្រាស់ បន្ទាប់ពី Apple Music ដំណើរការបាន ១ម៉ោង។ ដោយគ្រាន់តែមានគណនី Apple អតិថិជននឹងអាចប្រើប្រាស់ដោយឥតគិតថ្លៃនូវកម្មវិធី Beats 1។ កម្មវិធី Apple Music ក៏នឹងត្រូវបានដាក់ឱ្យប្រើប្រាស់ដោយមិនគិតថ្លៃរយៈពេល ៣ខែដំបូង ដើម្បីប្រើសាកល្បង ក្រោយមក Apple នឹងចាប់ផ្ដើមតម្រូវឱ្យបង់ប្រាក់ ៩,៩៩ដុល្លារ/ខែ/ម្នាក់ និង ១៥ដុល្លារ/ខែ សម្រាប់កញ្ចប់គ្រួសារដែលមានសមាជិក ៦រូប។ អ្នកប្រើប្រាស់សេវាកម្មនេះនឹងអាចរីករាយជាមួយចម្រៀងចំនួនជាង ៣០លានបទ។
សេចក្ដីប្រកាសក៏បានបង្ហើបឱ្យដឹងដែរថា កំណែ Apple Music នៅលើ iOS, Mac OS X និង Windows នឹងត្រូវបានដាក់ឱ្យប្រើប្រាស់នាពេលដ៏ខ្លីខាងមុខ ខណៈដែល Apple TV និង Android នឹងបង្ហាញខ្លួនក្រោយគេ នៅរដូវស្លឹកឈើជ្រុះឆ្នាំនេះ។ តាមគម្រោង ប្រព័ន្ធប្រតិបត្តិ iOS 9 នឹងបង្ហាញខ្លួននៅក្នុងពេលជាមួយគ្នានេះដែរ ប្រការនេះនឹងជួយបង្កើនចំនួនបទចម្រៀងក្នុង iTunes Match ដែលបង្ហាញខ្លួននៅលើ Apple Music ឡើងដល់ ១០០.០០០បទ (បច្ចុប្បន្ន មានត្រឹមតែ ២៥.០០០បទប៉ុណ្ណោះ)៕
ប្រែសម្រួលដោយ ៖ តារាប្រភព ៖ gsmarena/9to5mac