ស្ទើរតែមិនគួរអោយជឿ ៖ បុរសម្នាក់ត្រូវបានរកអោយឃើញថា ពិតជាមិនខ្លាចស្លាប់ហួសបន្ទាប់ពីគាត់ហ៊ានលេងល្បែងគ្រោះថ្នាក់មួយគឺ ការឃុំខ្លួនឯងនៅក្នុងការក្តារមឈូស ខណៈដៃជាប់ខ្នោះនោះ រួចធ្វើការទម្លាក់ក្តារមឈូសនោះពីលើយន្តហោះ ក្នុងរយៈកំពស់មួយដ៏ខ្ពស់ នេះបើយោងតាមការដកស្រង់អត្ថបទផ្សាយ ពីគេហទំព័រសារព័ត៌មាន ប្លែកបរទេសmetro ដែលទើបតែបានចេញផ្សាយកាលពីថ្ងៃពុធ ទី៧ ម្សិលមិញនេះ។
គួរបញ្ជាក់ផងដែរថា បុរសដែលហ៊ានប្រឈមលេងល្បែងគ្រោះថ្នាក់ បោះទម្លាក់ចុះពីលើអាកាសមួយប្រភេទនេះ មានឈ្មោះថា លោក Anthony Martin វ័យ ៤៧ ឆ្នាំ ។ លើសពីនេះទៅទៀត ប្រភពសារព័ត៌មានដដែលបន្ថែមថា ករណីផ្សងលេងល្បែងគ្រោះថ្នាក់ខាងលើនេះ គឹបានធ្វើឡើងនៅឯភាគនិរតី ចម្ងាយប្រមាណជាង ៧០ ម៉ាយ ពីទីក្រុង Chicago រដ្ឋIllinois សហរដ្ឋអាមេរិក។
ដោយឡែក បើនិយាយពីការលេងល្បែងគ្រោះថ្នាក់មួយនេះ គឺតែងហៅថា skydive ការលោតចុះពីលើអាកាស ក្នុងរយៈកំពស់មួយដ៏ខ្ពស់ ខណៈពេលដែលមកជិតដល់ដីនោះគេនឹងធ្វើការក្រលាស់ឆ័ត្រយោង ដើម្បីធ្វើការចុះចត ។ ដោយឡែក លើកនេះវិញ ករណីលេងល្បែងមួយនេះ ពីសំណាក់លោក Anthony ត្រូវបានរកអោយឃើញថា ពិតជាហ៊ានហួស ក៏ព្រោះតែវាខុសទៅនឹងការលេងដូចសព្វដង ពោលគឺ ការចាក់សោរបង្ខាំងទុកគាត់នៅក្នុងក្តារមឈូស ខណៈពេលដែលដៃរបស់គាត់ជាប់ខ្នោះថែមទៀតនោះ រួចធ្វើការបោះក្តារមឈូសនោះចុះពីលើយន្តហោះ ដែលមានរយៈកំពស់ដល់ទៅជាង ៤ ពាន់ម៉ែត្រ។
ជាមួយនឹងសិល្បៈជំនាញខាងឆ្ពិនភ្នែក លោក Anthony ក៏បានធ្វើវាបានជោគជ័យ ពោលគឺធ្វើការរំដោះខ្លួនចេញពីក្តារមឈូស ជាប់សោរមួយនោះ បន្ទាប់ពីបានធ្វើអោយដៃរបស់លោកលែងជាប់ខ្នោះ រួចក៏ធ្វើការក្រលាស់ឆ័ត្រយោងនិងចុះចតមកដីដោយសុវត្ថិភាព ។ជ្រាបកាន់តែច្បាស់ តាមដានទស្សនាវីដេអូឃ្លីបខ្លីខាងក្រោមនេះបន្តិចទៅ ៖
ដោយ ៖ រិទ្ធីប្រភព ៖ Metro